کۆمپانیای ڤۆلکسواگنی ئەڵمانی بۆ پیشەسازیی ئۆتۆمبێل، بەهۆی کێبڕکێی توند و بەربڵاوی ئۆتۆمبێلە چینییەکان لە بازاڕەکانی جیهاندا، پلانێکی نوێی داناوە، کە تێیدا تا ساڵی 2030 نزیکەی 100 هەزار کارمەند لە کارەکانیان دووربخاتەوە و کۆتایی بە بەرهەمهێنان لە چوار کارگەی سەرەکی خۆی بهێنێت. 

رۆژنامەی (فاینانشاڵ تایمز)ی بەریتانی، کە تایبەتمەندە بە هەواڵە دارایی و ئابوورییەکان، ئاشکرای کردووە کە ڤۆلکسواگن بە جددی تاوتوێی کەمکردنەوەی ئەم رێژە زۆرەی دەسی کار دەکات.

ئەم هەوڵەی کۆمپانیاکە، مەبست لێی کەمکردنەوەی تێچوەزۆرەکانیەتی وەک یەکێک لە گەورەترین کۆمپانیاکانی ئۆتۆمبێل لە ئەوروپادا؛ بە جۆرێک ئەم بڕیارە کاریگەری دەکاتە سەر یەک لەسەر شەشی کۆی گشتی کارمەندانەکانی کۆمپانیاکە دەبێت، کە لە سەرانسەری جیهاندا ژمارەیان دەگاتە 625 هەزار کارمەند.

بەپێی زانیارییەکانی رۆژنامەکە، پلانەکە داخستنی هێڵەکانی بەرهەمهێنان لە کارگەکانی ڤۆلکسواگن لە شارەکانی (ئێمدن، زویکاو، و هانۆڤەر) دەگرێتەوە، جگە لە کارگەی کۆمپانیای (ئۆدی) لە شاری (نیکارسۆلم)، کە بڕیارە ورەکارییەکانی ئەم پلانە لە 9ی تەمموزی داهاتوودا پێشکەش بە ئەنجومەنی چاودێری کۆمپانیاکە بکرێت.