كۆڕبەندی نێودەوڵەتیی ستراتیژیی سلێمانی بە سەرپەرشتی قوباد تاڵەبانی و بە بەشداریی ژمارەیەكی زۆر لە سەركردە سیاسییەكان بەڕێوەدەچێت و دوو رۆژ بەردەوام دەبێت.

ئەمڕۆ پێنجشەممە، بە سەرپەرشتیی قوباد تاڵەبانی و بەشداریی ژمارەیەكی زۆر لە سەركردە سیاسییەكان، بڕیاربەدەستان، دیپلۆماتكاران، فەرماندە سەربازییەكان و توێژەرانی ناوخۆیی و نێودەوڵەتی، كارەكانی كۆڕبەندی ستراتیژیی سلێمانی دەستپێبكات و بۆ ماوەی دوو رۆژ بەردەوام بێت.

بەپێی كارنامەی كۆڕبەندەكە، گفتوگۆ و پانێڵەكانی ئەمساڵ تیشك دەخەنەسەر گرنگترین گۆڕانكارییە جیۆپۆلەتیكی و ئەمنییەكانی رۆژهەڵاتی ناوەڕاست و جیهان، ئاسایش و سەقامگیریی، داهاتووی پەیوەندییە دیپلۆماسییەكان، ئاڵنگاری و دەرفەتەكانی گەشەپێدانی ئابووری لە ناوچەكەدا.

كۆڕبەندی ستراتیژیی سلێمانی بە یەكێك لە سەكۆ دیپلۆماسییە گرنگەكانی ناوچەكە دادەنرێت و پشت بە لیژنەیەكی راوێژكاریی نێودەوڵەتی دەبەستێت كە چەندین كەسایەتیی ناسراوی جیهانی لەخۆدەگرێت، بە ئامانجی رەخساندنی زەمینەیەكی لەبار بۆ دیالۆگ و دۆزینەوەی چارەسەر بۆ قەیرانە هەنووكەییەكان.

وتەبێژی سوپای پاکستان، ئامادەیی وڵاتەکەی بۆ جێبەجێکردنی سەرجەم رێکارە پێویستەکان بەمەبەستی بەرگریکردن لە سعوودیە لە چوارچێوەی "پەیمانی مەککە" راگەیاند و جەختی کردەوە کە پابەندبوونی ئیسلامئاباد بە ئاسایشی ریازەوە، بابەتێکە جێگەی دانوستان نییە.

ئەحمەد شەریف چۆدری، وتەبێژی سوپای پاکستان لە چاوپێکەوتنێکدا لەگەڵ رۆژنامەی "شەرقولئەوسەت" ئاماژەی بەوە کرد، جێبەجێکردنی کردەیی بڕگەکانی پەیمانی مەککە، رێکارەکانی جێگیرکردنی خێرای هێز و توانا سەربازییەکان لە خاکی سعودیەدا دەگرێتەوە.

ناوبراو پشتڕاستیشی کردەوە، کە لە ئێستادا هێزەکانی پاکستان بە ئەرکی بەرگریی، پاڵپشتی و ئەنجامدانی مانۆڕی سەربازی لەو وڵاتەدا جێگیر کراون.

هاوکات وتەبێژی سوپای پاکستان ئەوەشی خستە ڕوو، کۆبوونەوەی ڕۆژی 26ی تشرینی یەکەمی نێوان نوێنەرانی وڵاتانی ئەندام لە پەیمانی مەککە لەگەڵ لێپرسراوانی تاران، بە ئامانجی کەمکردنەوەی گرژییەکان و بەهێزکردنی هەماهەنگییە ناوچەییەکان بەڕێوەچووە.

پەیمانی مەککە رێککەوتنێکی بەرگریی هاوبەشە کە لە نێوان هەریەکە لە سعوودیە، پاکستان و تورکیادا ئیمزا کراوە و بەپێی ناوەڕۆکەکەی، هەر هێرشێکی چەکداری بۆ سەر یەکێک لەو وڵاتانە، وەک هێرش بۆ سەر هەرسێ وڵاتەکە هەژمار دەکرێت.

فایەق زێدان رایگەیاند، حکومەتەکەی عەلی زەیدی ئیرادەیەکی راستەقینەی بۆ روبەڕوبونەوەی گەندەڵێ هەیە و دەستگیرکردنی ئەو ژمارە لێپرسرا و باڵادەستە بەڵگەیە بۆ ئەو راستییە.

فایەق زێدان، سەرۆکی ئەنجومەنی باڵای دادوەریی عیراق، لە کۆڕبەندێکدا لە پەیمانگەی "چاتام هاوس" لە لەندەن رایگەیاند، حکومەتی ئێستای عیراق ئیرادەیەکی راستەقینەی بۆ روبەڕوبونەوەی گەندەڵی هەیە و بۆ یەکەمجارە ئەم ژمارە زۆرەی تۆمەتباران، لەوانەش وەزیر، پەرلەمانتار و بەرپرسانی باڵا، روبەڕووی یاسا دەکرێنەوە.

زێدان جەختیکردوەتەوە، هیچ وەستان یان خاوبونەوەیەک لە راوەدونانی گەندەڵکاراندا نییە و دادگا هیچ هێڵێکی سوور نییە بۆ دەستگیرکردنی گەندەڵکاران.

ناوبراو ئاماژەی بەوەکردوە، دادگا جیاوازی لە نێوان بەرپرسی کۆن، نوێ، گەورە یان بچووک ناکات، بەڵکو بڕیارەکانی تەنها لەسەر بنەمای بەڵگەی یاساییە نەک تۆمەتی بێ بەڵگە و سەرکەوتنی پرۆسەکەش بەندە بە هەماهەنگیی بەهێزی نێوان دەسەڵاتی جێبەجێکردن و دادوەری.

فایەق زێدان ئەوەشیخستوەتەڕوو، لە روبەڕوبونەوەی گەندڵیدا ئەو ئەنجامانەی لە عیراق و  لە رێگەی یاسا و پرۆسەی دادوەرییەوە بەدەست هاتوون، رەنگە لە هیچ وڵاتێکی دیکەی عەرەبی بە هەمان رێکاری یاسایی بەدەست نەهاتبێت.