نێچرڤان بارزانی بە جیا لەگەڵ ئەردۆغان و ئەحمەد شەرع لە ئەنتاڵیا كۆبووەوە و لەكۆبوونەوەی لەگەڵ ئەردۆغان وتی، پێویستە پەكەكە بەدەم بانگەوازەكەی ئۆجەلانەوە بچێت.

سەرۆكایەتی هەرێمی كوردستان رایگەیاند، لە پەراوێزی كۆڕبەندی ئەنتاڵیا، نێچیرڤان بارزانی سەرۆكی هەرێمی كوردستان لەگەڵ رەجەب تەیب ئەردۆغان سەرۆك كۆماری توركیا كۆبووەوە.

لە كۆبوونەوەكەدا نێچیرڤان بارزانی ئاماژەی بەوە كرد، خوازیارن هاریكاری و بەرژەوەندی هاوبەشی نێوان هەرێم و توركیا فراوانتر بكەن. لەبارەی پڕۆسەی ئاشتیشەوە وتی، پێویستە پەكەكە بەدەم بانگەوازەكەی ئۆجەلانەوە بچێت و هەرێمیش ئامادەیە لەو رووەوە هەموو هاوكارییەكی توركیا بكات، تاكو سەقامگیری ناوچەكە پارێزراو بێت.

لە درێژەی كۆبوونەوەكاندا، نێچیرڤان بارزانی چاوی بە ئەحمەد شەرع كەوت و دڵنیایی پێدا هەرێم بەردەوام دەبێت لە پشتیوانیەكانی بۆ سوریا. جەختیشی لەوەش كردەوە پابەندن بە بەرەنگاربوونەوەی هاوبەش دژی داعش. 

روداوێکی هاتوچۆ لە چوارقوڕنە، گیانلەدەستدانی کەسێک و برینداربونی حەوت کەسی لێکەوتەوە.

راگەیاندن و ھۆشیاری بەڕێوەبەرایەتی ھاتوچۆی راپەڕین، بڵاوی کردەوە؛ ئەمشەو، سەعات هەشتی شەو، روداوێکی دڵتەزێنی هاتوچۆ لە ناوچەی چوارقوڕنە رویدا کە تێیدا کەسێک گیانی لەدەستدا و حەوت کەسی دیکەش برینداربون.

بەپێی زانیارییەکانی پەیامنێری کوردسات نیوز، روداوەکە پێکدادانێک بووە لە نێوان دوو ئۆتۆمبێلی جۆری فۆرد و نیسان سەنی.

سەرچاوەیەکی نزیک لە نەخۆشخانەی فریاکەوتنی ناوچەکە بە کوردسات نیوزی راگەیاند، دوای گەیاندنی بریندارەکان بۆ نەخۆشخانە، بەداخەوە یەکێک لە بریندارەکان بەناوی "دەشتی حەمەدەمین" گیانی لەدەست دا.

چالاکوانێکی کەیسی ئەنفال و جینۆساید رایگەیاند کە دوای بەدواداچوونێکی بەردەوام، شوێنی ژمارەیەک گۆڕی بەکۆمەڵی ئەنفالکراوانیان لە سنوری پارێزگای کەرکوک دۆزیوەتەوە کە تا ئێستا بە شاراوەیی مابونەوە.

هێمن حەسیب، چالاکوانی کەیسی ئەنفال و جینۆساید، لە پەیجی تایبەتی خۆیدا بڵاوی کردەوە کە دوای سێ مانگ لە بەدواداچوونی بەردەوام، ئەمڕۆ هەینی، توانیویانە گۆڕستانێک لە کەرکوک بدۆزنەوە کە روفاتی ژمارەیەک لە ئەنفالکراوانی تێدا نێژراوە.

ئەو چالاکوانە ئاشکرای کردوە کە گۆڕستانەکە دەکەوێتە ناوچەیەکی دوورەدەست لە دەوروبەری گوندی تۆپزاوە و نزیکەی 100دۆنم زەوی پێکهێناوە. زیاتر لە هەزار گۆڕی تێدایە کە هەمویان بەبێ کێلن و بە ئەستەم دیارە کە گۆڕن.

هێمن حەسیب ئاشکراشی کردووە کە بەپێی بەدواداچونەکانیان، نزیکەی ٪80ـی گۆڕەکانی ئەو گۆڕستانە، گۆڕی روفاتی ئازیزانی ئەنفالکراوانن و بەپێی بەڵگەنامەکانی رژێمی بەعس، ٪100 بۆیان پشتڕاست بوەتەوە.

چالاکوانەکە رایگەیاندووە کە سبەی شەممە لە کۆنگرەیەکی رۆژنامەوانیدا، زانیاریی تەواو لەسەر ژمارە و شوێنی ناشتنی روفاتەکان و بەڵگەکانی رژێمی بەعس و چەندین زانیاریی گرنگی دیکە دەخەنە رو، دواتریش سەردانی شوێنی گۆڕەکان دەکەن.