تادێت شەڕی كۆمپانیا گەورەكانی ئەمریكا و چین پەرەدەسەنێت و ململانێ سیاسییەكانی ئەو دوو وڵاتە، لەسەر مێزی دەسەڵاتدارەكانیانەوە گواستراوەتەوە بۆ زیان گەیاندن بە بازاڕەكانی هەردوولا.

كۆمپانیای تیك تۆك كە چین خاوەندارێتی دەكات رایگەیاند، لە بەشێك لە ویلایەتەكانی ئەمریكا ئەپڵیكەیشنەكەیان لەكاركەوتووە و پێویستە ترەمپ بڕیارێك دەربكات، ئەمەش دوای ئەوە هات 17ـی ئەم مانگە دادگای باڵای ئەمریكا بڕیاری قەدەغەكردنی تیك تۆكیدا.

بڕیارەكەی دادگای باڵای ئەمریكا لەبارەی قەدەغەكردنەكەوە دوای ئەوە هات كە ئیدارەی بایدن بە دادگای باڵای راگەیاندووە، تیكتۆك زانیاری لەسەر ئاسایشی نیشتمانیی لە 170 ملیۆن ئەمریكی كۆدەكاتەوە بۆیە پێویستە قەدەغە بكرێت، چونكە چین دەتوانێت بە نهێنی دەستكاری پلاتفۆڕمەكە بكات بۆ پێشخستنی بەرژەوەندییە سیاسییەكانی و زیان بە ئەمریكا بگەیەنێت.

جێبەجێكردنی بڕیاری قەدەغەكردنی تیك تۆك دەكەوێتە ئەستۆی ئیدارەی ترەمپ كە 20ـی مانگ دەستبەكار دەبێت، بەڵام ترەمپ بۆچونێكی جیاوازی هەیە و بە میدیاكانی وتووە كە خۆی چارەسەری دەكات.

میدیاكانی ئەمریكا باس لەوەدەكەن، ترەمپ نایەوێت تیك تۆك لە ئەمریكا قەدەغەبكرێت بەڵكو دەیەوێت ئەپەكە لە چین بكڕێتەوە و ئەمریكا خاوەندارێتی بكات، لەسەر ئەم پرسەش قسەی لەگەڵ سەرۆكی چین كردووە و بڕیار وایە لەماوەی سەرۆكایەتییەكەیدا ئاڵوگۆڕی خاوەندارێتی ئەپەكە ئەنجامبدات.

لە ئێستادا زۆرینەی كۆمپانیاكانی ئەمریكا لە بواری ئۆتۆمبێل، مۆبایل، ئامێرە ئەلكترۆنییەكان بەهۆی هەرزانی دەستی كارەوە لە چین بەرهەمدەهێنرێن، كە دواتر دەیبەنەوە بۆ بازاڕەكانی ئەمریكا و لەوێ دەفرۆشرێن بەوەش لەڕووی داراییەوە قازانجێكی زۆر دەگەڕێتەوە بۆ خەزێنەی وڵاتەكە.

هاتنەسەر دەسەڵاتی نوخبەیەكی نوێی سیاسیی لە واشنتن بەتایبەتی ئیدارە نوێیەكەی ترەمپ، یان بازرگانی گەورەن یان پاشخانێكی ئابووریی زاڵە بەسەر بیركردنەوەكانیاندا.

ئەم نوخبە نوێیە هەموو بڕیارێك لەبارەی هاوكێشە سیاسی و سەربازی و ئابوورییەكان كە واشنتن لەسەر ئاستی جیهان دەریدەكات، بەوە دەیبینێت كە تا چ رادەیەك سودی ئابووریی بۆ ئەمریكا دەبێت، بەمەش هەموو روداوەكان دەبنە كاڵا و هەمیشە نرخێكی لەسەر دادەندرێت.

بەڵام لە راستیدا ئەم دەستكەوتە ئابوورییە هەموو خەڵكی ئەمریكا لێی سودمەند نابن، وەك بایدن لە وتاری ماڵئاواییدا وتی، نیگەرانە سەبارەت بە كەڵەكەبوونی دەسەڵات و سامان لەلایەن گروپێكی بچووكەوە و چڕبوونەوەی دەسەڵات لە دەستی چەند كەسێكی زۆر دەوڵەمەند، دەرئەنجامی ترسناكی دەبێت ئەگەر خراپ بەكارهێنانی دەسەڵاتیان بەبێ چاودێریكردن بمێنێتەوە.

تیك تۆك پلاتفۆرمێكی بەناوبانگی سۆشیال میدیایە كە رێگە بە بەكارهێنەران دەدات ناوەڕۆكی ڤیدیۆی كورت دروستبكەن و بڵاویبكەنەوە، لە سەرەتادا لە ساڵی ٢٠١٦ لەلایەن كۆمپانیای بایتدانسی چینییەوە لە ژێر ناوی "دۆویین" بۆ بازاڕی چینی خرایە بازاڕەوە، دواتر لە ساڵی ٢٠١٧دا بە ناوی "تیك تۆك" لە ئاستی نێودەوڵەتیدا بڵاوكرایەوە، پلاتفۆرمەكە بە خێرایی گەشەی كردووە و بووەتە یەكێك لە ئەپەكانی زۆرترین بەكارهێنراو لە سەرانسەری جیهاندا، بەتایبەتی گەنجان و لە ئێستادا زیاتر لە یەك ملیار بەكارهێنەری هەیە.