قوباد تاڵەبانی جێگری سەرۆک وەزیرانی هەرێمی کوردستان بڵاویکردەوە، ئەمڕۆ پەردەیان لەسەر پەیکەری عومەر شێخ موس و ئەگنیتا لاداوە و دەشڵێت: مایەیەی شەرەفێکی گەورەیە.

دەقی بڵاوکراوەکە:

ئەو کاتەی خۆشەویستی و خەبات بۆ ئازادی گەلی کورد ئاوێتەی یەکتر دەبن، چیرۆکێکی نوێ لەدایک دەبێت، چیرۆکی ژیانی عومەر شێخ موس و ئەگنیتا (خوشکە تارا).

ئەمیان لە شاری عامودای رۆژئاوای کوردستانەوە، بە دڵێکی شەیدا و پڕ لە خۆشەویستی کوردستانەوە و بە عەقڵ و بیرێکی کوردانەوە دەکەوێتەڕێ و سنوورە دەستکردەکان دەبڕێت و خۆی لەناو خەباتی باشووری کوردستان و لەناو دەستەی دامەزرێنەری یەکێتیی نیشتمانیی کوردستاندا دەبینێتەوە. ئەویتریشیان بە دڵێکی پڕ لە خۆشەویستی هاوسەرەکەی و بە بیرێکی ئازادیخوازانە و مرۆڤدۆستانەوە سنووری نەتەوەکان دەبڕێت و خۆی لە چیاکانی کوردستان و لەناو ریزی خەباتکارانی کورددا دەبینێتەوە.

ئەمڕۆ بە شەرەفێکی گەورەوە وەک وەفایەک پەردەمان لەسەر پەیکەری ئەو دوو هەڤاڵە خەباتکارەمان لادا. بۆ هەمیشە شانازییان پێوەدەکەین. هیوای تەندروستی و تەمەندرێژی بۆ کاک عومەری سەرکردە و هاوڕێی دێرینی سەرۆک مام جەلال دەخوازین و سڵاو بۆ گیانی پاکی خاتوو ئەگنیتای کۆچکردوو دەنێرێن.

عومەر شێخموس، ئەندامی دەستەی دامەزرێنەری یەکێتیی نیشتمانیی کوردستان، لە کۆڕبەندی ئابوری نێودەوڵەتی دێڵفی لە سلێمانی رایگەیاند، هەرێمی كوردستان بەراورد بە عیراق و وڵاتانی ناوچەكە زۆر سەقامگیرترە، هەروەها ئەمنیەت و ئاسایشی هەرێم دەرفەتێكی باشە بۆ وەبەرهێنان و پەرەپێدانی ئابوری.

عومەر شێخموس ئاماژەی بەوەشکرد، مافەکانی گەلی کورد لە دەستوری عیراقدا چەسپێنراون و هەرێمی کوردستان بەراورد بە ناوچەکانی تری عیراق و وڵاتانی ناوچەکە خاوەن رەوشێکی سەقامگیرترە.

ئەوەشی خستەڕوو، ئەم ئاسایشە دەرفەتێکی باشە بۆ وەبەرهێنان، هەروەها وڵاتانی دراوسێ رۆڵیان لە ناسەقامگیری عیراقدا هەبووە و هێزە کوردییەکانیش لە پرسە گەورەکاندا یەکگرتوو بوون.