شانەی راگەیاندنی ئەمنی عیراق رایدەگەیەنێت؛ لە چوارچێوەی رێکخستنەوەی دۆخی ناوچەکە و چەسپاندنی سەروەریی عیراقدا، لە ئەمڕۆوە رێگاکانی جورف سەخر بەڕووی هاووڵاتیاندا دەکرێنەوە و پۆلیسی وزەش ئەرکی پاراستن و بەڕێوەبردنی بۆرییە نەوتییەکانی گرتە دەست.
 
بەپێی راگەیەندراوێکی شانەی راگەیاندنی ئەمنی عیراق، گۆڕانکارییە ئەمنییەکان لە ناوچەی جورف سەخر لە ئەمڕۆوە چوونەتە بواری جێبەجێکردنەوە و پرۆسەکە چەند رۆژێکی پێویستە بۆ تەواوبوونی، کە بەهۆیەوە سەرجەم رێگاکانی ناوچەکە بەڕووی هاووڵاتیاندا دەکرێنەوە.
 
فەریق سەعد مەعن، سەرۆکی شانەی راگەیاندنی ئەمنی ئاشکرایکرد، پلانە ئەمنییەکان وەک خۆی جێبەجێدەکرێن و رەوشەکە بە تەواوی لەژێر کۆنترۆڵدایە. ئاماژەی بەوەشکرد، هەمووان بەوپەڕی لێپرسراوێتی و گیانی نیشتمانییەوە مامەڵەیان لەگەڵ دۆخەکەدا کردووە و لە ئێستاشدا پۆلیسی وزە دەستبەکاربووە بۆ پاراستن و بەڕێوەبردنی بۆرییە نەوتییەکانی جورف سەخر.
 
هاوکات، فەرماندەی بارەگای کۆنترۆڵی جورف سەخر جەختی لەوەکردەوە، ئەم هەنگاوانە دەستپێکن بۆ سەپاندنی تەواوەتی سەروەریی عیراق لە ئەمڕۆوە، سبەینێ رێگای سەرەکیی جورف سەخر بەرەو پارێزگای کەربەلا بەڕووی هاتوچۆی هاووڵاتیاندا دەکرێتەوە.