لە کەشێکی پڕ لە گرژیی ئەمنی و ناکۆکیی قوڵی سیاسیدا، 26ـەمین خولی پەرلەمانی ئیسرائیل 'کەنێسێت' بە سوێندخواردنی سەرجەم ئەندامەکانی دەستی بە کارەکانی کرد.

پێگەی ئیسرائیل تایمز بڵاویکردەوە، دەستپێکی ئەم خولەی پەرلەمانی ئیسرائیل، بە ئامادەبوونی کەسوکاری قوربانییانی 7ـی ئۆکتۆبەر لەناو پەرلەمان، دەستیپێکرد و لە دەرەوەی باڵەخانەی پەرلەمانیش، لایەنگرانی حزبە راستڕەوەکان خۆپیشاندانیان لە دژی بەشداربوونی لایەنە عەرەبەکان لە حکومەتی نوێی ئیسرائیلدا دەکرد.

ئاماژەی بەوەشداوە، لە ناوەوەی هۆڵی پەرلەمان، هەر 120 ئەندامەکەی کەنێسێت یەک بە یەک سوێندی یاساییان خوارد و سکرتێری گشتیی کەنێسێت بەرەسمی خولی26ـەمی پەرلەمانی راگەیاند.

ئەوەشی روونکردووەتەوە، دەستپێکردنی ئەم خولەی کەنێسێتی ئیسرائیل لەنێوان گرژییەکانی شەقام و برینەکانی 7ـی ئۆکتۆبەر لە ناوەوەی هۆڵەکەدا، ئاماژەیەکی روونە بۆ ئەوەی کە گۆڕەپانی سیاسیی ئیسرائیل بەرەو قۆناغێکی پڕ لە ئاڵۆزی، پەرتەوازەیی و چەقبەستوویی زیاتر سەبارەت بە چارەنووسی دەسەڵات و پێکهێنانی حکوومەتی داهاتوو، هەنگاو دەنێت.

وەزیری دەرەوەی ئەمریکا رایدەگەیەنێت، سزاکانی ئەمریکا، ئێران سست دەکەن و پێویست بە هێرشی سەربازیی فراوان بۆ سەر ئەو وڵاتە ناکات.

مارکۆ روبیۆ، وەزیری دەرەوەی ئەمریکا لە پەراوێزی بەڕێوەچوونی کۆبوونەوەی (G7) لە پاریس کە تایبەتە بە وەزیرانی دەرەوەی وڵاتانی ئەندام تێیدا رایگەیاند، گەمارۆ ئابووری و دەریاییەکانی واشنتۆن بۆ سەر تاران ئەوەندە کاریگەر بوون، پێویست بە ئەنجامدانی هێرشی سەربازیی فراوان ناکات، هاوکات مەرجەکانی ئێستای ئێران بۆ رێککەوتن رەتدەکاتەوە.

ئاماژەی بەوەشکرد، وڵاتەکەی هاوپەیمانەکانی ئاگادارکردووەتەوە، کە سزا و گەمارۆ دەریاییەکانی ئەمریکا ئابووریی ئێرانی سست کردووە بە جۆرێک، کە دۆناڵد ترەمپ، سەرۆکی ئەمریکا پێویستی بە ئەنجامدانی ئۆپەراسیۆنی سەربازیی دژ بە ئێران نابێت.

وەزیری دەرەوەی ئەمریکا راشیگەیاند، سزا ئابوورییەکانی ئەمریکا بۆ سەر ئیران بە تێپەڕبوونی کات قورستر دەبن، بەڵام واشنتۆن هێشتا دەرگای کراوەیە بۆ گەیشتن بە رێککەوتنێکی راستەقینە.