دوا بە دوای دۆڕانەکانیان لە هەڵبژاردنەکان، دۆناڵد ترەمپ، سەرۆکی ئەمریکا لەگەڵ راوێژکارانی دەوروبەری و لە رێگەی پەیوەندی تەلەفۆنییەوە دەستی کردووە بە راوێژکردن سەبارەت بەوەی ئایا پیت هێگسێت، وەزیری جەنگی ئەمریکا لە پۆستەکەیدا بەردەوام بێت یاخود نا.

کەناڵی سی بی ئێسی ئەمریکی لە راپۆرتێکدا بڵاویکردوەتەوە؛ دۆناڵد ترەمپ دەیەوێت شکستەکەی بخاتە ئەستۆی وەزیری جەنگ و  ئادمیراڵ براد کوپەر، سەرۆکی فەرماندەیی ناوەندی ئەمریکا (سێنتکۆم) و ژەنڕاڵ دان کەین، سەرۆکی دەستەی ئەرکانی هاوبەشی ئەمریکا، کە هەرسێکیان رۆڵی سەرەکییان هەبووە لە رێنماییکردنی جەنگی ئێراندا.

لە راپۆرتەکەدا ئەوەخراوەتەڕوو، دۆناڵد ترمپ پرسیاری کردوە ئاخۆ پێویستە وەزیری جەنگ لە پۆستەکەتدا بمێنێتەوە، چونکە پێیوایە بەهۆی سیاسەتی جەنگەوە، بەتایبەت جەنگی ئێران توشی شکست بوون لە هەڵبژاردنەکاندا.

ئاماژەی بەوەشکردوە، سەرۆکی ئەمریکا هێشتا بڕیاری کۆتایی لەسەر لادانی هێگسێست نەداوە، بەڵام تاوتوێی ئەو پرسەی کردوە.

ئەمەش لە کاتێکدایە پێش هەڵبژاردنەکانیش دیموکراتەکان هەوڵی لێسەندنی متمانەیان لە وەزیری جەنگدا دەدا و چاوەڕوان دەکرێت بەهۆی بەدەستهێنانی زۆرینەی رەها لە هەردوو ئەنجومەنی نوێنەران و پیراندا، ئەم هەوڵانەی دیموکراتەکان توندتر ببێتەوە.

لە وەڵامی ئەم دەنگۆیانەدا، ئانا کێلی، وتەبێژی کۆشکی سپی جەختی کردەوە کە ترەمپ "متمانەی تەواوی بە وەزیر هێگسێست هەیە و ستایشی کارە سەربازییەکانی لە ئێران و ڤەنزوێلا و هەوڵەکانی بۆ چاکسازی لە پێنتاگۆن کردوە.

چەک شومەر، سەرۆکی دیموکراتەکان لە ئەنجومەنی پیرانی ئەمریکا، داوای کۆتاییهێنانی بە جەنگی ئەمریکا دژی ئێران کرد و جەختی کردەوە،  کە گەلی ئەمریکا هۆکارە راستەقینەکانی پشت دەستپێکردنی ئەم جەنگە نازانن.

ئەمڕۆ چوارشەممە، دوای سەرکەوتنی دیموکراتەکان بەسەر کۆمارییەکاندا،  چەک شومەر لە لێدوانێکی رۆژنامەوانیدا رایگەیاند، ئەمریکییەکان نازانن بۆچی جەنگ دژی ئێران دەستی پێکردووە و پێویستە کۆتایی پێ بێت، دەشڵێت؛  ئەو رۆژانە رۆیشتن کە ئەنجومەنی پیران ملکەچی دۆناڵد ترەمپ بوو.

شومر یەکێکە لەو کەسایەتیانەی ئەمریکا بەردەوام دژی جەنگی ئێران بووە و رەخنەی لە نەبوونی ستراتیژێکی رون بۆ جەنگەکە گرتووە و ئیدارەی ترەمپی تۆمەتبار کردووە بەوەی وەڵامی پێویستی سەبارەت بە ئامانجەکانی کردارە سەربازییەکان و لێکەوتەکانی نەداوەتەوە.

لە نوێترین هەڵوێستیشیدا لە 28ی تشرینی یەکەمی رابردوو، شومەر جەختی کردەوە کە ئەم جەنگەی ماوەی هەشت مانگە بەردەوامە، پلانی رونی بۆ کۆتاییهێنان نییە، ئاماژەی بە بەرزبوونەوەی تێچووە ئابووری و مرۆییەکانی و کاریگەرییە راستەوخۆکانی لەسەر نرخی سوتەمەنی و گوزەرانی ئەمریکییەکان کرد.

ئەم لێدوانانە هاوكاتە لەگەڵ دانپێنانی دۆناڵد ترەمپو  جەی دی ڤانسی  جێگری، بەوەی  جەنگی ئێران یەکێک بووە لە هۆکارەکانی دۆڕانی کۆمارییەکان لە هەڵبژاردنەکانی نیوەی خولی کۆنگرێس، کە بووە هۆی سەرکەوتنی دیموکراتەکان و کۆنتڕۆڵکردنی هەردوو ئەنجومەنی نوێنەران و پیران.