وەزارەتی دەرەوەی کوەیت، ئەمڕۆ سێشەممە، محەممەد تۆتونچی، باڵیۆزی ئێرانی لە دەوڵەتی کوەیت بانگهێشت کرد و یاداشتێکی ناڕەزایەتی رادەست کرد، بەهۆی ئەوەی ئێران ئێوارەی دوێنێ دووشەممە کەشتیی نەوتهەڵگری کوەیتیی لە کاتی تێپەڕبوونی لە گەروی هورمز کردووەتە ئامانج و لە ئەنجامدا ژمارەیەک لە کارمەندانی کەشتییەکە بریندار بوون.

راگەیەندراوی وەزارەتی دەرەوە لە سەرچاوەی حەمەد سلێمان ئەلمەشعان، جێگری وەزیرەوە بڵاویکردووەتەوە کە وتوویەتی: ئەم دەستدرێژییە ئاشکرایە لە سایەی پەرەسەندنی ئەو دەستدرێژییە ناڕەوایەدا دێت کە ئێران لە 28ی شوباتی 2026ەوە دژی دەوڵەتی کوەیت دەستی پێکردووە، لەنێویشیاندا ئەو بەیاننامە هاندەر و پارپێکهێنەرانەی لە لایەنی ئێرانییەوە دەردەچن. ئەمەش بەپێشێلکارییەکی زەق بۆ سەروەریی دەوڵەتی کوەیت و سەلامەتیی خاک و بەرژەوەندییەکانی، و هەڕەشەیەک بۆ سەر ئاسایش و ئازادیی کەشتیوانیی نێودەوڵەتی، و بەزاندنی یاسای نێودەوڵەتی و پەیماننامەی نەتەوە یەکگرتووەکان و بڕیاری ژمارە 2817ی ساڵی 2026ی ئەنجومەنی ئاسایش دادەنرێت.

ئەو بەرپرسەی کوەیت جەختی لەسەر داواکاریی وڵاتەکەی لە ئێران کردەوە بۆ راگرتنی دەستبەجێی هێرشە نایاساییەکانی، هاوکات جەختیشی کردەوە: دەوڵەتی کوەیت مافی خۆی دەپارێزێت بۆ گرتنەبەری رێکارە پێویستەکان، و ئێرانی بە بەرپرسیاری تەواوەتیی ئەم دەستدرێژییە و هێرشە بەردەوامەکانی بۆ سەر دەوڵەتی کوەیت هەژمار کرد.

دەسەڵاتدارانی هەردوو وڵاتی بەحرەین وکوەیت رایانگەیاند، کە وڵاتەکانیان رووبەڕووی هێرشی ئێرانی بوونەتەوە، هاوکات سیستەمەکانی بەرگریی ئاسمانی چالاک کراون و هۆشداریش دراوەتە دانیشتووان بۆ پابەندبوون بە رێنماییەکانی سەلامەتی.

وەزارەتی ناوخۆی بەحرەین رایگەیاند، کە زەنگی ئاگادارکردنەوە لێدراوە، داواشی لە هاووڵاتییان و دانیشتووانی وڵاتەکەی کردووە کە ئارامگری بپارێزن و روو لە نزیکترین شوێنی ئارام بکەن، هاوکات لەڕێگەی کەناڵە رەسمییەکانەوە بەدواداچوون بۆ پێشهاتەکان بکەن.

لە کوەیتیش، سەرۆکایەتیی ئەرکانی گشتیی سوپا رایگەیاند کە سیستەمەکانی بەرگریی ئاسمانی لە ئێستادا بەرپەرچی هێرشە مووشەکییەکان و فڕۆکە بێفڕۆکەوانە دوژمنکارییەکان دەدەنەوە، کە وەک خۆی وەسفی کردووە دوای "دەستدرێژییە ناڕەواکەی ئێران" هاتوو.

سوپای کوەیت روونیشیکردەوە: ئەو دەنگی تەقینەوانەی دانیشتووان دەبیستن لە ئەنجامی کردە سەربازییەکانی بەرگریی ئاسمانییەوەیە بۆ رێگریکردن لە هێرشە هاتووەکان، داواشی لە هەمووان کردووە بە رێنماییەکانی ئاسایش و سەلامەتیی لایەنە پەیوەندیدارەکانەوە پابەند بن.

لە چوارچێوەی هەڵمەتە بەردەوامەکانی قایمقامییەتی قەزای ناوەندیی هەولێر بۆ ڕێگریکردن لە بڵاوبوونەوەی کاڵای نایاسایی و زیانبەخش، ئەمڕۆ سێشەممە، نزیکەی 30 هەزار جگەرەی ئەلیکترۆنی (ڤەیپ) لە پرۆسەیەکدا لەناو بردران.

پرۆسەی لەناوبردنەکە بە ئامادەبوونی نەبەز عەبدولحەمید، قایمقامی قەزای ناوەندیی هەولێر بەڕێوەچوو.

ئەو کاڵایانە لە ئەنجامی بەدواداچوون و پشکنینە مەیدانییەکانی لیژنە هاوبەشەکانی قایمقامییەت لە بازاڕەکاندا دەستیان بەسەردا گیرابوو، دوای ئەوەی دەرکەوت بە شێوەی قاچاغ هێنراونەتە هەرێمی کوردستان و مەرجە تەندروستییەکانیان تێدا نییە.

لای خۆیەوە، قایمقامی هەولێر جەختی کردەوە کە لیژنەکانیان بەردەوام دەبن لە چاودێریکردنی بازاڕەکان و رێکاری یاسایی توند بەرانبەر هەر سەرپێچییەک دەگرنەبەر کە سەلامەتی و تەندروستیی هاووڵاتییان بخاتە مەترسییەوە.

ئاماژەی بەوەش کرد کە پرۆسەی لەناوبردنی ئامێرە دەستبەسەرداگیراوەکانیش بەپێی رێنماییە رەسمییەکان و لە شوێنێکی تایبەتدا ئەنجام دراوە.