لە بەردەوامی کۆبوونەوەکانیدا لە بەغداد، وەفدی باڵای یەکێتیی نیشتمانیی کوردستان بە سەرۆکایەتیی قوباد تاڵەبانی و ئامادەبوونی هەر یەکە لە دەرباز کۆسرەت رەسوڵ، خالید شوانی و یوسف گۆران، لەگەڵ نوری مالیکی، سەرۆکی هاوپەیمانیی دەوڵەتی یاسا کۆبووەوە.

لە کۆبوونەوەکەدا، تاوتوێی رەوشی سیاسی عیراق و چۆنیەتی بەرەوپێشچوونی گفتوگۆکانی پێکهێنانی حکومەتی نوێ کرا  و وەفدی یەکێتی دید و روانینی یەکێتیان بۆ داهاتووی عیراق و حکومەتی نوێ خستەڕوو.

قوباد تاڵەبانی بە ئاماژەدان بە کێشە و ئاڵنگارییەکانی بەردەم عیراق و رەوشی ئابووری و کێشەکانی نێوان هەرێم و بەغدا، روونی کردەوە، پێویستە هەموو لایەنە عیراقییەکان پێکەوە هاوکار و هەماهەنگ بن بۆ پێکهێنانی حکومەتێک، کە لە ئاستی قۆناغەکەدا بێت و بتوانێت سەقامگیری عیراق بپارێزێت و لەڕووی خزمەتگوزاری و گەشەپێدانی ئابووریشەوە هەنگاوی گەورە بنێت.

جەختیشی کردەوە،دەبێت حکومەتی داهاتوو کێشەکانی هەرێم و بەغداد بەپێی دەستوور چارەسەر بکات و هەرێم و بەغداد پێکەوە هاوکاربن بۆ گەشەپێدانی ئابووری و باشترکردنی رەوشی خزمەتگوزاری و ژیان و گوزەرانی هاوڵاتییان.