بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە وەفدێکی باڵای مەکتەبی سیاسیی سادقوون کرد و رایگەیاند، پەرۆشی سیاسەتی نیشتمانیی یەکێتیین بۆ کاری هاوبەش و شەراکەتی راستەقینە لە عیراقدا.

لە دیدارەکەدا کە دکتۆر نەعیم عەبودی سەرۆکایەتی وەفدەکەی سادقوونی دەکرد و بە ئامادەبوونی دەرباز کۆسرەت رەسوڵ و نزار ئامێدی، ئەندامانی مەکتەبی سیاسی بەڕێوەچوو، گفتوگۆ لەبارەی پەرەپێدانی پەیوەندییەکانی نێوان هەردوولا کرا لەپێناو پاراستنی بەرژەوەندییە باڵاکان و خزمەتکردنی گەل و وڵات.

هەر لە دیدارەکەدا جەخت لە پێویستیی بەردەوامیی گفتوگۆی بونیاتنەر و هاریکاریی نێوان لایەنە سیاسییەکان کرایەوە، بە ئامانجی سەرخستنی پرۆسەی سیاسی و پاراستنی سەقامگیریی عیراق، هەروەها پابەندبوون بە وادە دەستورییەکان بۆ پێکهێنانی حکومەتی نوێ.

بافڵ جەلال تاڵەبانی سیاسەتی یەکێتیی بۆ کاری هاوبەش دووپاتکردەوە و رایگەیاند: "دەمانەوێت حکومەتێک بونیات بنێین کە وەڵامدەرەوەی خواستی خەڵکە خۆشەویستەکەمان بێت و ببێتە مایەی خزمەتکردنی زیاتر و بوژاندنەوەی وڵات، ئەوەش تەنها بە پرۆژەی هاوبەش دێتەدی".