عیراق دەست بەسەر پارە و سامانی دەیان سەرکردە و ئەندامی داعش و قاعیدەدا دەگرێت و ناوی جۆلانی گۆڕی بە ئەحمەد شەرع و  بزوتنەوەی ئەنساروڵا (حوسییەکان)ی یەمەن و حزبوڵای لوبنانیشی خستە لیستی تیرۆرەوە.

لیژنەی سڕکردنی پارەی تیرۆریستان لە عیراق، زنجیرەیەک بڕیاری نوێی دەرکرد بۆ دەستبەسەرداگرتنی پارە و سامانی ژمارەیەک سەرکردە و ئەندامی رێکخراوی داعش و قاعیدە، هاوکات ناوی سەرکردەیەکی دیاری گروپە چەکدارەکانی سوریای لە لیستەکەدا راستکردەوە.

رۆژنامەی وەقائیعی عیراقی لە ژمارە (4848)دا چەندین بڕیاری لیژنەی سڕکردنی پارەی تیرۆریستانی لە ئەمینداریەتیی گشتیی ئەنجومەنی وەزیران بڵاوکردەوە، کە تایبەتن بە سڕکردنی سامانی گواستراوە و نەگواستراوەی دەیان کەسایەتی و قەوارە.

سڕکردنی پارەی سەرکردەکانی داعش لە پارێزگاکان:

بەپێی بڕیاری ژمارە (60)، دەست بەسەر پارە و سامانی پێنج سەرکردەی دیاری داعشدا گیراوە کە پلەی باڵایان هەبووە، ئەوانیش بریتین لە:

  • رافد قادر عەبدولئیبراهیم (ئەلوەیسی): سەرکردە لە دەوروبەری خانەقین لە پارێزگای دیالە.

  • عەبدوڵا ئیبراهیم حوسێن (ئەبو مەهدی بازی): بەرپرسی بەشی رۆژهەڵاتی شاری سامەڕا لە پارێزگای سەلاحەدین.

  • کەنعان ئیبراهیم عەلی (ئەبو عوبەیدە): بەرپرسی راگەیاندنی ویلایەتی باشوور.

  • مەوفەق ئیبراهیم عەجاج (خەلیل حەدیدی): ئەمیر لە قەزای حەمدانییە (قاطع)ی نەینەوا.

  • هەزال حەمید جاسم (ئەبو عەبدوڵا): سەرکردە لە داعش.

لیستی نوێی تیرۆر و دەستبەسەرداگرتنی سامانەکانیان:

لە بڕیارەکانی دیکەدا (56، 57، 58، 59)، لیژنەکە بڕیاریداوە بە سڕکردنی پارەی دەیان کەسی دیکە کە تۆمەتبارن بە ئەندامێتی لە داعش لە پارێزگاکانی ئەنبار و نەینەوا و ناوچەکانی تر، لەوانە خێزانی (زێدان مەحمود زێدان خەڵەف حەمدانی) و گروپی (ئەحمەد فەتحی غەزال عوبێدی).

هەروەها بەپێی بڕیاری ژمارە (61)، لیستی سزاکان فراوانتر کراوە و (76) کەسایەتی و (24) قەوارە و رێکخراوی مالیزی خرانە لیستی رەشەوە کە پەیوەندییان بە رێکخراوی "جەماعەتی ئیسلامی" و "قاعیدە"وە هەیە.

راستکردنەوەی ناوی جۆلانی: 

لە بڕیاری ژمارە (62)دا، گۆڕانکاری لە زانیارییەکانی لیستی سزاکانی ئەنجومەنی ئاسایشی نێودەوڵەتی کراوە تایبەت بە سەرۆکی "دەستەی تەحریری شام". بەپێی بڕیارەکە، ناوی (ئەبو محەمەد جۆلانی) راستکراوەتەوە بۆ ناوی راستەقینەی خۆی کە (ئەحمەد حوسێن شەرع)ە و هەڵگری رەگەزنامەی سورییە.

ئەم بڕیارانە بەپێی یاسای بەرەنگاربوونەوەی سپیکردنەوەی پارە و تیرۆر ژمارە (39)ی ساڵی 2015 و بڕیارەکانی ئەنجومەنی ئاسایشی نێودەوڵەتی دەرچوون و دەستبەجێ دەچنە بواری جێبەجێکردنەوە.