لێپرسراوێکی بزووتنەوەی حەماس بە ئاژانسی فرانس پرێسی راگەیاندوە؛ داواکاری رادەستکردنی چەکەکانیان وەک ئەوەی لە پلانەکەی ترەمپدا هاتووە؛ بۆ کۆتاییهێنان بەشەڕی غەززە قبوڵکراو نییە و تەنانەت شایەنی قسە لەسەرکردنیش نییە.
 
ئەمڕۆ شەممە، لەسەر زاری لێپرسراوێکی باڵای حەماسەوە، ئاژانسی فرانس پرێس بڵاویکردوەتەوە، حەماس چەکدانانێت و ئەو پرسەشی یەکلایکردوەتەوە.
 
ئەو بەرپرسەی حەماس کە ویستیی بووە؛ ناوی ئاشکرا نەکرێت، جەختیکردوەتەوە پرسی رادەستنەکردنی چەکەکانیان کۆتایی هاتووە و تەنانەت شایەنی پرسیارکردنیش نییە.
 
ئەم لێدوانانەی لێپرسراوەکەی حەماس، لە کاتێكدایە ئەمڕۆ دووەم رۆژی ئاگربەستی نێوان ئیسرائیل و حەماسە، دوو لایەنەکەی شەڕ ڕۆژی پێنجشەممە لە شەرم شێخی میسر رێککەوتنێکیان واژۆ کرد و ئەوەش رێگەی خۆشکرد بۆ کۆتایی هێنان بە شەڕی دوو ساڵەی کەرتی غەززە.
 
دوێنێش حازم قاسمی وتەبێژی حەماس، بە کەناڵی عەرەبییەی راگەیاند بوو؛ چەکەکانی دەستیان بە "ئامرازێکی بەرگریی شەرعی" وەسف کرد و ئاماژەی بەوەکردوە؛ ئەوان بەرپرسیارێتی نیشتیمانیان لە ئەستۆدایە و لە ئێستادا کار بۆ دۆزینەوەی چارەسەرێکی گونجاو دەکەن.
 
ئەمە لە کاتێکدایە، ترەمپ لە پلانە 20 خاڵیەکەیدا، ئاماژەی بەوەداوە کە پرسی رادەستکردنی چەکەکانی حەماس لە چوارچێوەی قۆناغی دووەمی پلانی ئاشتیدا چارەسەر دەکرێت.