لە بەغداد، خانمی یەکەمی عیراق یادی دامەزراندنی منداڵپارێزی کوردستانی کردەوە و جەختی کردەوە: "پاراستنی منداڵان ئامانجێکی پیرۆزە"

ئێوارەی رۆژی پێنجشەممە، بە سەرپەرشتی و ئامادەبوونی خاتوو شاناز ئیبراهیم ئەحمەد، خانمی یەکەمی عیراق، رێکخراوی منداڵپارێزی کوردستان لە کۆشکی سەلام لە بەغداد، مەراسیمێکی شایستەی بەبۆنەی 34هەمین ساڵیادی دامەزراندنییەوە سازکرد.

لە مەراسیمەکەدا کە ئەحمەد ئەسەدی، وەزیری کار و کاروباری کۆمەڵایەتی، و ژمارەیەک بەرپرسی باڵا و نوێنەری نێردە دیپلۆماسییەکانی عیراق ئامادەیبوون، خانمی یەکەم وتارێکی پێشکەشکرد. لە وتارەکەیدا، ئاوڕی لە قۆناغەکانی دامەزراندنی رێکخراوەکە لە ساڵی 1991ەوە دایەوە و تیشکی خستە سەر ئەو ئامانجانەی کە لەپێناویدا کاریان کردووە بۆ پاراستنی مافەکانی منداڵان و دابینکردنی ژیانێکی ئارام و شکۆمەندانە بۆیان.

خاتوو شاناز ئیبراهیم ئەحمەد ئاماژەی بەوەدا کە رێگای رێکخراوەکە ئاسان نەبووە بەهۆی ئەو سەختی و نەهامەتیانەی روبەروی گەلی کوردستان بووەتەوە، و جەختی لە رۆڵی کارا و مرۆییانەی خاتوو هێرۆ ئیبراهیم ئەحمەد کردەوە لە چارەسەرکردنی کێشە و نەهامەتییەکانی منداڵاندا.

خانمی یەکەم پەیامە سەرەکییەکەی دووپاتکردەوە و وتی: "پاراستنی منداڵان بەرپرسیارێتییەکی هاوبەشە و دەکەوێتە ئەستۆی دەوڵەت، لایەنە پەیوەندیدارەکان و کۆمەڵگا. ئەمە ئەرکێکی نیشتمانی و بەهایەکی مرۆیی و ئامانجێکی پیرۆزە کە بنیاتنانی وڵاتێکی ئارام و خۆشگوزەرانی لەسەر وەستاوە."

لەلایەن خۆیەوە، خاتوو سارا رەشید، سەرۆکی رێکخراوی منداڵپارێزی کوردستان، باسی لە ستراتیژییەت و بەرنامە فراوانەکانی رێکخراوەکەیان کرد کە کارکردنیان لە بوارەکانی تەندروستی، پەروەردە، پەرەپێدانی ژێرخانی ئابووری و پشتگیریکردنی گەنجان لەخۆدەگرێت.

مەراسیمەکە پێشانگایەکی وێنەیی لەخۆگرتبوو کە کار و چالاکییەکانی 34 ساڵی رابردووی رێکخراوەکەی نیشان دەدا، لەگەڵ پێشکەشکردنی چەند پارچە مۆسیقا و گۆرانییەکی فۆلکلۆری کوردی و عەرەبی کە بەشداربووان چێژیان لێ بینی.

دۆناڵد ترەمپ، سەرۆکی ئەمریکا، پەیوەندییەکی تەلەفۆنی لەگەڵ شی جینپینگ، سەرۆکی چین، ئەنجامدا و دواتر رایگەیاند کە پەیوەندییەکە "زۆر بەرهەمدار و باش" بووە. 

ترەمپ ئاشکرای کرد کە لە چەندین بابەتی گرنگدا پێشکەوتنیان بەدەستهێناوە و سەردانێکی چاوەڕوانکراویشی بۆ چین لە سەرەتای ساڵی داهاتوودا راگەیاند.

سەرۆکی ئەمریکا لە پۆستێکدا لەسەر تۆڕی کۆمەڵایەتی "تروس سۆشیاڵ" (Truth Social) نووسیویەتی: "تازە پەیوەندییەکی زۆر بەرهەمدارم لەگەڵ شی جینپینگ سەرۆکی چین، کۆتایی پێهێنا. ئێمە لە چەندین بابەتی زۆر گرنگدا پێشکەوتنمان بەدەستهێنا، لەوانە بازرگانی، ماددەی فێنتانیل، پێویستیی کۆتاییهێنان بە جەنگی نێوان روسیا و ئۆکراین، و پەسەندکردنی رێککەوتنی تیکتۆک".

رێککەوتنی تیکتۆک و سەردانە چاوەڕوانکراوەکان:

یەکێک لە گرنگترین دەستکەوتەکانی ئەم پەیوەندییە، چارەنووسی ئەپلیکەیشنی تیکتۆک بوو. ترەمپ سوپاسی سەرۆکی چینی کرد بۆ "پەسەندکردنی رێککەوتنی تیکتۆک" و رایگەیاند کە کۆمەڵێک کۆمپانیای گەورەی ئەمریکی ئارەزووی کڕینی پشکەکانی تیکتۆکیان هەیە لە ئەمریکا. ئەم رێککەوتنە لە چوارچێوەی ئەو یاسایەدایە کە لە ساڵی 2024دەرچوو و داوای لە کۆمپانیای خاوەنداری چینی (ByteDance) دەکرد پشکەکانی لە ئەمریکا بفرۆشێت، ئەگینا روبەروی قەدەغەکردن دەبێتەوە.

سەبارەت بە پەیوەندییە دیپلۆماسییەکان، ترەمپ رایگەیاند: "لەگەڵ سەرۆک شی رێککەوتم کە لە لوتکەی کۆڕبەندی هاوکاریی ئابووری ئاسیا و زەریای هێمن (APEC) لە کۆریای باشوور یەکتر ببینین. هەروەها من لە سەرەتای ساڵی داهاتوودا سەردانی چین دەکەم و سەرۆک شی'یش بە هەمان شێوە، لە کاتێکی گونجاودا دێتە ویلایەتە یەکگرتووەکان".

پاشخان و ناکۆکییەکان

پەیوەندییەکانی نێوان واشنتۆن و پەکین لە ماوەی ڕابردوودا بەهۆی ناکۆکییە بازرگانییەکانەوە گرژیی بەخۆیەوە بینیبوو. هەردوو وڵات هەڕەشەی سەپاندنی باجی گومرگییان بە ڕێژەی زیاتر لە %100 بەسەر کاڵاکانی یەکتردا کردبوو، بەڵام لە ئێستادا ئاگربەستێکی کاتی لە ئارادایە کە ترەمپ تا 10ی تشرینی دووەمی درێژکردووەتەوە.

ئەمە دووەم پەیوەندیی تەلەفۆنیی نێوان هەردوو سەرۆکە لەدوای دەستبەکاربوونەوەی ترەمپ لە 20ی کانوونی دووەم، و سێیەم پەیوەندییانە لە سەرەتای ئەمساڵەوە، کە ئاماژەیە بۆ هەوڵەکان بۆ کەمکردنەوەی گرژییەکان و چارەسەرکردنی کێشە هەڵپەسێردراوەکان لەنێوان دوو گەورەترین ئابووریی جیهاندا.

بەرێوبەرایەتی هاتوچۆی سلێمانی لە راگەیەندراوێکدا چەند رێنماییەکی ئاراستەی شۆفێران کرد بۆ خۆپاراستن و سەلامەتی لەکاتی خۆڵباریندا و داوادەکات پابەندی ئەم خاڵانە بن.

1. کەمکردنەوەی خێرایی: لەبەرئەوەی لە کاتی خۆڵبارینی چڕدا ئاستی بینین زۆر کەم دەبێتەوە، پێویستە خێرایی ئۆتۆمبێلەکەت بە شێوەیەکی بەرچاو کەم بکەیتەوە.

2. پاراستنی ماوەی سەلامەتی: هەمیشە ماوەیەکی سەلامەت و گونجاو لەنێوان ئۆتۆمبێلی خۆت و ئۆتۆمبێلی پێشەوەت بهێڵەرەوە.

3. دڵنیابوون لە فڵچەی جامەکان: پێویستە دڵنیابیت لەوەی کە بڕی پێویست ئاو لە دەبەی فڵچەکاندا هەیە و فڵچەکان بە باشی کاردەکەن بۆ پاککردنەوەی جامی پێشەوە.

4. خۆپاراستن لە شۆفێریی شەوانە: تا دەکرێت لە شۆفێریکردن لە کاتەکانی شەودا خۆت بپارێزە، بەتایبەتی ئەگەر خۆڵبارینەکە چڕ بوو.

5. سنووردارکردنی گەشتی دەرەوەی شار:
* ئەگەر زۆر پێویست نەبێت، گەشتکردن و شۆفێری لە رێگاوبانی دەرەوەی شارەکان دوابخە تا کۆتاییهاتنی شەپۆلی خۆڵبارینەکە.
* لە ئەگەری ناچاریدا، پێویستە زیاتر پابەندی خێرایی دیاریکراو بیت، لایتی نزمی ئۆتۆمبێل (رووناکی نزم) دابگیرسێنیت، و بە هیچ شێوەیەک هەوڵی تێپەڕاندنی (سەبقەکردن) هەڵە و مەترسیدار نەدەیت.

6. پەیوەندیکردن لە کاتی پێویستدا: لە کاتی رودانی هەر حاڵەتێکی نەخوازراودا، دەتوانیت پەیوەندی بە هێڵی گەرمی کۆنترۆڵی هاتوچۆی سلێمانییەوە بکەیت لەسەر ژمارە 188.