سەرۆک کۆماری عیراق پێشوازی لە سەرۆکی پارتی تەقەدوم و وەزیری رۆشنبیری و گەشتوگوزار و شوێنەوار کرد

د.لەتیف رەشید سەرۆک کۆماری عیراق، بە ئامادەبوونی د. ئەحمەد فەکاک بەدرانی وەزیری رۆشنبیری و گەشتوگوزار و شوێنەوار پێشوازیکرد لە محەمەد حەلبوسی سەرۆکی پارتی تەقەدوم.

لە میانی دیدارەکەدا کە ئەمڕۆ لە بەغداد بەڕێوەچوو، رەوشی گشتی وڵات و پێشهاتەکانی ناوچەکە تاوتوێ کرا و هاوکات جەختیشکرایەوە لەسەر گرنگی پاراستنی هەماهەنگی و هاریکاری نێوان هێزە سیاسییەکان بۆ چەسپاندنی ئاسایش و سەقامگیری.

هەروەها لە کۆبوونەوەکەدا باس لە ئامادەکارییە بەردەوامەکان کرا بۆ سازکردنی هەڵبژاردنێکی دادپەروەرانە و شەفاف کە ڕەنگدانەوەی ویستی عیراقییەکان بێت لە هەڵبژاردنی نوێنەرەکانیان و پێویستی بەشداریی هەموو لایەک بۆ جێگیرکردنی رێڕەوی دیموکراسی لە وڵاتدا.

هەر لە کۆبوونەوەکەدا باس لە رۆڵی وەزارەتی ڕۆشنبیری کرا لە پەرەپێدانی هۆشیاریی هەڵبژاردن لای هاووڵاتیان لە رێگەی چالاکی کۆمەڵایەتیەکان و سیمیناری رۆشنبیری.