سەرۆكی ئەمریكا رایگەیاند هێرشەكانی وڵاتەكەی بەرنامە ئەتۆمییەكەی ئێرانی راگرت بە وتەی ترەمپ هێرشەكان نەبوایە ئێران لە دوو مانگی دیکەدا دەبووە خاوەنی چەكی ئەتۆمی.

دۆناڵد ترەمپ سەرۆكی ئەمریكا رایگەیاند، هەوڵەكانی بۆ راگرتنی جەنگ لە جیهاندا بەردەوام دەبێت وهێرشی سەر دامەزراوە ئەتۆمییەكانی ئێران لە چوارچێوەی راگرتنی جەنگدا بوە.

ترەمپ وتیشی، ئەگەر هێرشەكانی ئەمریكا نەبوایە، ئێران دەیتوانی لە ماوەی دوو مانگی دیکەدا چەكی ئەتۆمی دروست بكات.

ئەمریكا لە مانگی شەشی ئەمساڵدا هەرسێ دامەزراوەی ئەتۆمیی فۆردۆ، نەتەنز و ئەسفەهانی بۆردومان كرد و سەرۆكی ئەمریكاش دوای بۆردومانەكە رایگەیاند، بەرنامەی ئەتۆمیی ئێرانیان لەناوبردوە.

میدیا ناوخۆییەکانی فەرەنسا بە پشتبەستن بە سەرچاوەکانی حکومەتی خۆجێی لە باشووری وڵاتەکە بڵاویانکردەوە، ئاگرێکی گەورە هەزاران هێکتار زەوی دەسوتێنێت.

راپۆرتەکان ئاماژە بەوە دەکەن کە زیاتر لە 4 هەزار و 500 هێکتار زەوی و بەروبووم لە ئاگرەکەدا سووتاون کە لە شاری ریباوت کەوتەوە.

بە وتەی بەرگری شارستانی ناوچەکە، بڵێسەی ئاگرەکە بە شێوەیەکی نائاسایی و خێرا بڵاوبووەتەوە و پێناچێت تا ئێوارە ئاگرەکە کۆنتڕۆڵبکرێت.

هاوکات زیاتر لە هەزار کەس لە تیمی ئاگرکوژێنەوە بۆ بەرەنگاربوونەوەی ئاگرەکە بەشداربوون، بە هۆی بای بەهێزیشەوە کۆنتڕۆڵکردنی ئاگرەکە ئەستەم بووە.

وەزارەتی دەرەوەی ئەمریکا بە توندی دژایەتی پرۆژەیاسای حەشدی شەعدی دەکات و ئاشکرایکرد، ئەمریكا پاڵپشتی لە تەواوی سەروەری عیراق دەكات.

تامی برۆس وتەبێژی وەزیری دەرەوەی ئەمریكا رایگەیاند، ئەمریکا بە توندی دژایەتی پرۆژە یاسای حەشدی شەعبی دەکات و  پاڵپشتی لە تەواوی سەروەری عیراق دەکەن.

وتیشی، ئەمریکا پاڵپشتی لەپرۆژە یاسایەك ناکات كە عیراق دەخاتە ناو بازنەی دەوڵەتێکی سەر بە ئێران، ئاماژەی بەوەشكرد، كە ئەم پرۆژە یاسایە، گروپە چەكدارەكان كە بەشێكیان گروپی تیرۆریستین و سەر بە ئێرانن بە یاسای و دەستووری دەكرێن.

تامی بروس ئەوەشی خستەڕوو، ئەم پڕۆژە یاسایە دژی رێككەوتنی ستراتیژی ئەمریکا لەگەڵ عیراق و یارمەتییە سەربازییەکانی ئەمریکا بۆ ئەو وڵاتە.