نوسینگەی رێبوار تەها، ئاشکرایکرد، فەرمان بە موەلیدە ئەهلییەکان کراوە کار بکەنەوە، هاوکات تا چارەسەرکردنی کێشەکەیان، ڕەزامەندی وەزارەتی کارەبا وەرگیراوە بۆ بەرزکردنەوەی پشکی کارەبای نیشتمانیی کەرکوک بۆ 800 مێگاوات.

نوسینگەی رێبوار تەها، جێگری یەکەمی پارێزگاری کەرکوک بڵاویکردەوە، رێبوار تەها فەرمانی بە کۆمەڵەی موەلیدە ئەهلییەکانی کەرکوک کرد کار بە موەلیدەکانیان بکەنەوە.

ئاماژەی بەوەشکرد، رەزامەندی وەزارەتی کارەباشی وەرگرت، پشکی کەرکوک لە کارەبای نیشتمانی لە 650 مێگاواتەوە بکرێت بە 800 مێگاوات تا کێشەی موەلیدە ئەهلییەکان چارەسەر دەکرێت.

پۆلیسی گەرمیان کەسێکی دەستگیرکرد کە بەناوی ژنەوە لە تۆڕە کۆمەڵایەتییەکان پارەی لە خەڵک وەرگرتبوو.

بەڕێوەبەرایەتی پۆلیسی گەرمیان ئاشکرایکرد، لە چوارچێوەی هەوڵە بەردەوامەکانی پۆلیسی گەرمیان بۆ رووبەڕووبوونەوەی خراپ بەکارهێنانی ئامێرەکانی پەیوەندی، بەشی پۆلیسی نەهێشتنی تاوانی گەرمیان تاوانبارێکی دەستگیرکرد.

ئاماژەی بەوەشکرد، دەستگیرکردنەکە دوای ئەوە هات کە هاووڵاتییەک سکاڵای یاسایی تۆمارکرد دژ بە کەسێکی نەناسراو، کە ماوەی زیاتر لە شەش ساڵ بوو لە رێگەی دوو ژمارەی تەلەفۆنەوە و بە ناوی ژنەوە لە تۆڕە کۆمەڵایەتییەکان، لەژێر هەڕەشە و خەڵەتاندندا پارەیەکی زۆری لێ سەندبوو.

پۆلیسی گەرمیان راشیگەیاند، پاش بەدواداچوون، کۆکردنەوەی زانیاری و وەرگرتنی فەرمانی دادوەر، لە رۆژی 28ـی تشرینی یەکەمی 2026 توانرا تۆمەتبار (أ . ح . ڕ) تەمەن 45 ساڵ دەستگیر بکرێت،

بەپێی ڕاگەیەندراوەکەی پۆلیس، تۆمەتبارەکە بەپێی مادەی 452 دەستگیرکراوە و لە کاتی لێکۆڵینەوەدا دانی بە تاوانەکەیدا ناوە و لێکۆڵینەوەکان لەگەڵیدا بەردەوامن.

لە کاتێکدا گفتوگۆکان لە رێگەی نێوەندگیرەکانەوە لە دەوحه لە نێوان واشنتۆن و تاران بەردەوامن، ئەمڕۆ وەزیری دەرەوەی ئێران رایگەیاند، وڵاتەکەی لە رێگەی قەتەر و پاکستانەوە سەرقاڵی گفتوگۆی چڕوپڕە لەگەڵ ئەمەریکا، بە ئامانجی کۆتاییهێنان بە جەنگ لە رۆژهەڵاتی ناوەڕاست و خۆپاراستن لە خولێکی نوێی جەنگ.

عەباس عراقچی، وەزیری دەرەوەی ئێران لە لێدوانێکدا بۆ ئاژانسی رەسمی ئیرنا ئاماژەی بەوەکرد، بەهۆی هەستیاری و مەترسی رەوشی ئێستا، راوێژ و گفتوگۆکان زۆر چڕن، هاوکات دەستخۆشی لە رۆڵی نێوەندگیر و چالاکی دەوحه و ئیسلامئاباد کرد لەو بوارەدا.

ئەوەشی خستەڕوو، قبوڵکردنی مەرجەکانی ئێران لەلایەن ئەمەریکاوە، دەبێتە هۆی کردنەوەی گەروی هورمز و دەستپێکردنەوەی گفتوگۆکان.