بافڵ جەلال  تاڵەبانی سەرۆكی یەكێتیی نیشتمانیی كوردستان، كشانەوەی حزبەكەی لە حكومەتی كاربەڕێكەری هەرێم راگەیاند.

لە پەیامێكدا بافڵ  جەلال تاڵەبانی سەرۆكی یەكێتی وردەكاریی هەوڵەكانی حزبەكەی بۆ پێكهێنانی حكومەت خستەڕوو و رایگەیاند، سەرباری ئەوەی زیاتر لە 15 جار سەردانی هەولێری كردووە بۆ پێكهێنانی حكومەتێكی جیاواز و خزمەتگوزار، بەڵام پارتی دیموكراتی كوردستان هەر مەرحەلەیەكی پێشكەوتنیان بە بیانوویەك تێكداوە.

سەرۆكی یەكێتی رایگەیاند، كەمینەیەك لەناو ئەو حزبە سەلماندیان كە دیموكراسی نازانن، رێز لە دەنگدەر ناگرن و پارەی خەڵك بۆ كڕین و هەڕەشەكردن لە پەرلەمانتاران بەكاردەهێنن.

بافڵ جەلال تاڵەبانی راشیگەیاند، دوای وەرگرتنی دەسەڵاتی تەواو لە سەركردایەتیی حزبەكەی، یەكەم بڕیاریان كشانەوەیە لەو حكومەتە شكستخواردووە و و دووپاتی كردەوە كە لەمەودوا هەموو هێز و توانای خۆیان بۆ خزمەتكردنی خەڵك لە دەڤەرەكەی خۆیان بەكاردەهێنن.

لە بەشێكی تری پەیامەكەیدا، سەرۆكی یەكێتی هۆشداریی توندی بە پارتی دا كە واز لە هێز جووڵاندن و ترساندنی خەڵك بهێنن و وتی: "مەجبوورمان مەكەن كاردانەوەمان هەبێت، چی بكەن لەوێ ئێمە لێرە دەیكەین؛ سەرۆكی هەرێم، سەرۆكوەزیران و وەزیر دابنێن، ئێمەش دایدەنێین. لە كۆتاییشدا جەختی كردەوە: ئێوە دەستان پێكرد، بە خوای گەورە من تەواوی دەكەم."

عەلی زەیدی و دۆناڵد ترەمپ پەیوەندییەکی تەلەفونیان ئەنجامدا و هەدولا جەختیان لە گرنگی کارکردن بۆ پاڵپشتیکردنی سەقامگیریی ناوچەکە و زآڵبونی زمانی دیالۆگ و دیپلۆماسی بۆ چارەسەرکردنی کێشەکان.

ئەمڕۆ پێنجشەممە، نوسینگەی سەرۆک وەزیرانی عیراق رایگەیاند، عەلی فالح زەیدی سەرۆکی ئەنجومەنی وەزیرانی عیراق پەیوەندییەکی تەلەفۆنی لەگەڵ دۆناڵد ترەمپ سەرۆکی ئەمریکا ئەنجامدا.

بە گوێرەی زانیارییەکان، لە پەیوەندییەکەدا دوایین پێشهاتە ئەمنییەکان، رەوشی ناوچەکە و ئاسۆکانی قۆناغی داهاتوو تاوتوێ کران.

هەردوولا جەختیان لەسەر گرنگی بەردەوامی هەماهەنگی و راوێژکاری نێوان بەغداد و واشنتن کردەوە بۆ روبەڕووبوونەوەی ئاڵنگارییەکان کردوە.

هەروەها پشتیوانیکردنی سەقامگیریی ناوچەیی و پێشخستنی زمانی دیالۆگ و دیپلۆماسی بە مەبەستی کۆنتڕۆڵکردنی ئاڵۆزییەکان و رێگریکردن لە فراوانبوونی بازنەی ململانێکان.

لە بەشێکی دیکەی گفتوگۆکەدا، سەرۆکی ئەنجومەنی وەزیران هەڵوێستی نەگۆڕی عیراقی دووپاتکردەوە سەبارەت بە رێزگرتن لە سەروەریی وڵاتان و رەتکردنەوەی بەکارهێنانی خاکی عیراق وەک دەستپێکێک بۆ دەستدرێژیکردنە سەر وڵاتانی دراوسێ

لە چوارچێوەی هەوڵەكان بۆ گەڕاندنەوەی ئاوارەكانی رۆژئاوای كوردستان كاروانێكی تری ئاوارەكانی سەرێكانی گەڕانەوە زێدی خۆیان.

لە درێژەی پرۆسەی گەڕانەوەی ئاوارەكان بۆ سەر زێد و ماڵوحاڵی خۆیان، هەشتەمین كاروانی ئاوارەكانی سەرێكانی و گوندەكانی دەوروبەری كە لە نزیكەی 447 خێزان پێكهاتبوون، گەیشتنەوە ناوچەكانیان.

ئەوەش لە كاتێكدایە كە رۆژی چوارشەممەی رابردوو حەوتەمین كاروانی ئاوارەكان گەڕانەوە بۆ گوندەكانی دەوروبەری شارەكە.

پێشتریش لە 21ی مانگی رابردوودا، شەشەمین كاروانی ئاوارەكانی سەرێكانی كە لە زیاتر لە 600 خێزان پێكهاتبوون، كەمپەكانیان جێهێشت و گەڕانەوە ناوچەكانی خۆیان، هاوكات نزیكەی 115 خێزانیش گەڕانەوە بۆ شاری حەسەكە.