سەرۆکی ئەمریکا ماوەیەکی درێژە رۆژنامەکە تۆمەتبار دەکات بە لایەنگری بۆ دیموکراتەکان و دژایەتیکردنی بزووتنەوەی "ماگا" (MAGA).

دۆناڵد ترەمپ رایگەیاند کە سکاڵا لە رۆژنامەی نیویۆرک تایمز دەکات، تەنها چەند رۆژێک دوای ئەوەی هەڕەشەی کرد بەهۆی ڕاپۆرتەکانیانەوە لەسەر پەیوەندییەکانی لەگەڵ جێفری ئێپستین.

لە پۆستێکدا لەسەر پلاتفۆرمی "تروس سۆشیاڵ" (Truth Social)، سەرۆکی ئەمریکا رایگەیاند کە "شانازییەکی گەورەی" هەیە کە "سکاڵایەکی ناوزڕاندن و بوختان بە بڕی 15 ملیار دۆلار" تۆمار دەکات دژی "یەکێک لە خراپترین و بەدڕەوشتترین رۆژنامەکانی مێژووی وڵاتەکەمان."

پۆستە درێژەکەی ترەمپ - کە درەنگانی رۆژی دووشەممە بڵاویکردەوە - جەخت لەسەر ئەو باوەڕەی دەکاتەوە کە دەزگاکە لایەنگری دیموکراتەکانە، و ئاماژەی بە پشتیوانیکردنی کامالا هاریس کرد لە هەڵبژاردنی سەرۆکایەتیی ساڵی رابردوودا.

هەروەها وتیشی، "[نیویۆرک تایمز] بۆ ماوەیەکی زۆر درێژ رێگەی پێدراوە بە ئازادی درۆ بکات، لەکەدارم بکات، و ناوم بزڕێنێت."

 

یسرائیل کاتز، وەزیری بەرگری ئیسرائیل: "غەززە دەسووتێت و تا تەواوکردنی ئەرکەکە ناگەڕێینەوە دواوە"

یسرائیل کاتز، وەزیری بەرگری ئیسرائیل، لە لێدوانێکدا جەختی لەسەر بەردەوامیی ئۆپەراسیۆنە سەربازییەکانی وڵاتەکەی لە کەرتی غەززە کردەوە و رایگەیاند کە تا گەیشتن بە ئامانجە دیاریکراوەکان سارد نابنەوە.

کاتز لە نووسینەکەیدا لە ئێکسی خۆی وێنەیەکی توندی لە دۆخی ئێستای غەززە نیشاندا و وتی: "غەززە دەسووتێت. سوپای ئیسرائیل بە دەستێکی پۆڵایین لە ژێرخانی تیرۆر دەدات و سەربازانی سوپای ئیسرائیل بە ئازایەتییەوە دەجەنگن بۆ دروستکردنی هەلومەرج بۆ ئازادکردنی بارمتەکان و تێکشکاندنی حەماس."

وەزیری بەرگری ئیسرائیل هەروەها سووربوونی وڵاتەکەی لەسەر بەردەوامیدان بە شەڕەکە دووپات کردەوە و وتی: "سارد نابینەوە و ناگەڕێینەوە دواوە - تا تەواوکردنی ئەرکەکە."

ئەم لێدوانە جەختکردنەوەیە لەسەر هەڵوێستی توندی حکومەتی ئیسرائیل سەبارەت بە بەڕێوەبردنی شەڕ لە غەززە، کە دوو ئامانجی سەرەکی بۆ خۆی دیاری کردووە: ئازادکردنی سەرجەم بارمتەکان و لەناوبردنی تەواوەتیی تواناکانی بزووتنەوەی حەماس. لێدوانەکەی کاتز هاوکاتە لەگەڵ بەردەوامیی ئۆپەراسیۆنە سەربازییە چڕەکانی سوپای ئیسرائیل لە ناوچە جیاجیاکانی کەرتی غەززە.