بە پێی بەرنامەی کاری یەکەم کۆبوونەوەی خولی پێنجەمی ئەنجومەنی نوێنەرانی عێراق، کە لە لایەن فەرمانگەی راگەیاندنی ئەنجومەنی نوێنەرانەوە بڵاوکراوەتەوە، سەعات ١١ کۆبوونەوەکە دەستپێدەکات و ئەمینداری گشتیی ئەنجومەنی نوێنەران وتارێک پێشکەش دەکات و ناوی پەرلەمانتارە ئامادەبووەکان دەخوێنێتەوە، دواتر پەرلەمانتاران سوێندی یاسایی دەخۆن، پاشان بە تەمەنترین پەرلەمانتار کە سەرۆکایەتیی دانیشتنەکە دەکات، وتارێک پێشکەش دەکات و دەرگای خۆپاڵاوتن بۆ پۆستەکانی سەرۆک و جێگرانی یەکەم و دووەمی سەرۆکی ئەنجومەنی نوێنەران دەکات.
تائێستا محەمەد حەلبوسی سەرۆکی ھاوپەیمانی تەقەدووم و سەرۆکی خولی پێشووی ئەنجومەنی نوێنەران، کاندیدی ھاوبەشی سوننەکانە بۆ سەرۆکی ئەنجومەنی نوێنەران و چاوەڕوان دەکرێت دووبارە پۆستەکە وەربگرێتەوە، پۆستی جێگرەکانیش لە نێوان شیعە و کورددا دابەش دەکرێت.