سەرۆك مام جەلال لە 6ی نیسانی 2005 دوای هەڵبژاردنی لەلایەن ئەنجومەنی نیشتمانی عیراقەوە  پۆستی سەرۆك كۆماری عیراقی پێدرا و لە 11-11-2010 بەزۆرینەی دەنگ جارێكی دیكە بە سەرۆك كۆمار بۆ خولی دووەم هەڵبژێردرایەوە.

بە هەڵبژاردنەوەشی سەرۆك مام جەلال بووە یەكەم سیاسی كورد لەمێژووی عیراقدا كە پۆستی سەرۆكی وڵات لەئەستۆ بگرێت، هەروەها یەكەم سەرۆك كۆماری هەڵبژێردراوە لەلایەن ئەنجومەنی نوێنەرانی عیراق لەمێژووی ئەو وڵاتەدا لەبیستەكانی سەدەی رابردوودا و یەكەم سەرۆك كۆماری عیراقە كە لەژێر دەستوری نوێی عیراقدا هەڵبژێردرابێت.

سەرۆک مام جەلال، كوڕی حسامەدین كوڕی نورەڵڵای تاڵەبانی رێكەوتنی 12ی تشرینی دووەمی ساڵی 1933 لەگوندی كلكانی بناری چیای كۆسرەت لەدایك بووە سەرەتای منداڵی هەر لەو گوندە دەبێت، پاشان باوكی دەبێتە رێبەری تەكیەی تاڵەبانی لەكۆیە لەماڵەوە دەچنە ئەوێ و خوێندنی سەرەتای لەو شارە تەواو دەكات، قۆناغی ئامادەی لەكەركوك و هەولێر تەواو دەكات.

مام جەلال لەتەمەنی لاوێتیدا تێكەڵی كاری سیاسی دەبێت، لەمانگی شوباتی ساڵی 1953 سەرپەرشتی سازدانی یەكەمین كۆنگرەی یەكێتی قوتابیان دەبێت و هەر لەو كۆنگرەیەدا بەسكرتێری گشتی ئەو رێكخراوە هەڵدەبژێردرێت و هەر لەهەمان ساڵدا دەبێتە یەكێك لەدامەزرێنەرانی یەكێتی لاوانی دیموكراتی كوردستان و ساڵانی 1953 بۆ 1955 دەبێتە سكرتێری لاوانی دیموكرات، ساڵی 1959 كۆلێژی یاسا لەبەغدا تەواو دەكات.

سەرۆك مام جەلال لە18ی كانوونی یەكەمی ساڵی 2012 لەبەغداد رەوشی تەندروستی ناجێگیر بوو، لەدوای ئەو نەخۆشكەوتنەی مام جەلال عیراق و گەلەكەی رووبەڕوی كێشەی گەورە بوونەوە، تەنانەت پەیوەندییەکانی نێوان هەرێم و عیراق بەتەواوی تێكچوو، تا دواتر لە 3-10-2017 سەرۆك مام جەلال لەنەخۆشخانەیەكی شاری بەرلینی ئەڵمانیا دڵە گەورەكەی لەلێدان كەوت.

حەوت پزیشکی کورد لەسەر ئاستی وڵاتانی عەرەبی پلەی یەکەمیان بەدەست هێنا و لەلایەن کۆمکاری عەرەبییەوە خەڵات دەکرێن.

بڕیارە ئەمڕۆ، لە باڵەخانەی سەرەکیی کۆمکاری وڵاتانی عەرەبی، ئاهەنگی دەرچوون و ڕێزلێنان بۆ دەرچووە یەکەمەکانی خولی ساڵی 2025ی ئەنجومەنی عەرەبی بۆ پسپۆڕییە تەندروستییەکان بەڕێوە بچێت.

بەپێی نووسراوێکی رەسمی ئەنجومەنی عەرەبی، لە کۆی گشتیی دەرچووانی سەرجەم پسپۆڕییە پزیشکییەکان لەو وڵاتانەی بەشداریی کۆمکارەکە دەکەن، تەنها 52 پزیشکی پسپۆڕ هەڵبژێردراون بۆ بەشداریکردن لەو ئاهەنگەدا، ئەوەش دوای ئەوەی لە کۆتایی خوێندن و راهێنانی پزیشکیی پێنج ساڵەی خۆیاندا توانیویانە پلەی یەکەم بەدەست بهێنن.

جێگەی شانازییە کە لەو رێوڕەسمە تایبەتەدا، حەوت پزیشکی کورد بەشداری تێدا دەکەن، دوای ئەوەی لە پسپۆڕییە جیاوازەکانی خۆیاندا لەسەر ئاستی وڵاتانی عەرەبی توانیویانە پلەی یەکەم بەدەست بهێنن و سەرکەوتنێکی گەورە تۆمار بکەن.

د. زاریا شێروان مەحمود/ پزیشکی پسپۆڕی ئافرەتان و مناڵبوون

د.هێرش قادر حەمەدئەمین/ پزیشکی پسپۆڕی هەناو

د.هێلین بورهان دەروێش/ پزیشکی پسپۆڕی پێست

د.هەورین عوسمان نوری/ پزیشکی پسپۆڕی بێ هۆشکاری

د.عومەر لوقمان سیامەند/ پزیشکی پسپۆڕی نەخۆشیە دەرونییەکان

د.عەلی ئیبراهیم حەسەن/ پزیشکی پسپۆڕی نەشتەرگەری میزەڕۆ

د.بەیار عەبدوڵا ئەحمەد/ پزیشکی پسپۆڕی وردی نەشتەرگەری میزەڕۆی مناڵان

چاوەڕوان دەكرێت لە ناوەڕاست و كۆتایی هەفتەی داهاتوودا لیستی موچەی مانگی 11 موچەخۆرانی هەرێم بۆ وەزارەتی دارایی عیراق بنێردرێت.

بەپێی دوایین زانیارییەكانی دەست كوردسات نیوز كەوتووە، هێشتا بەشێك لە وەزارەت و بەڕێوەبەرایەتییەكان لیستی موچەی مانگی 11 یان نەكردووەتە ناو سیستمی پەیڕۆڵەوە، كە بریتین لە پۆلیسی دارستان، وەزارەتی پەروەردە، بەڕێوەبەرایەتی گشتیی ئاو و ئاوەڕۆكان، بەڕێوەبەرایەتی گشتی وەرزش، بەڕێوەبەرایەتی گشتیی ژمێركاریی.

 پەیامنێری كوردسات نیوز لە هەولێر راشیگەیان ئەگەر ئەو دامەزراوانە ئەمڕۆ لیستی موچە داخڵی  سیستمی پەیڕۆڵەوە بكەن ، ئەوا سبەینێ پێنجشەممە لیستەكە رەوانەی وەزارەتی دارایی دەكرێت و لەوێش دەبێت وردبینی بۆ بكرێت، دواتر رەوانەی وەزارەتی دارایی عیراق دەكرێت، ئەگەر داخڵكردنی لیستی ئەو وەزارەت و بەڕێوەبەرایەتییانەش بۆ ناو سیستمی پەیڕۆڵ بكەوێتە رۆژی یەكشەممەوە، ئەوا تا وردبینی دەكرێت، ناردنی بۆ وەزارەتی دارایی عیراق دەكەوێتە ناوەڕاست و كۆتایی هەفتەی داهاتووەوە.