وەزیری دەرەوەی ئەمریکا رایدەگەنێت، ئەمریکا بە هیچ جۆرێک رێگە نادرێت ئێران کۆنتڕۆڵی گەروی هورمز بکات، چونکە ئەوە دەبێتە پێشینەیەکی مەترسیدار بۆ ناوچەکانی دیکەی جیهانیش.

مارکۆ روبیۆ، وەزیری دەرەوەی ئەمریکا رایگەیاند، تاران کەوتووەتە رەوشێکی زۆر دژوارەوە، جەختیشی لەسەر ئامادەیی واشنتن کردەوە بۆ پەنابردنە بەر بژارەی دیپلۆماسی و ئەنجامدانی دانوستان، بەپێی ئەوەی ئێران پابەندی رێککەوتنەکان بێت و رێگریی لە کەشتییە بازرگانییەکان نەکات لە گەروی هورمز.

ئاماژەی بەوە شکرد، کێشەی سەرەکییان لەگەڵ تاران ئەوەیە کە ئێرانییەکان بۆ ئەنجامدانی گفتوگۆ جددی نین، هۆشداریشی دا ئەگەر ئێران بەردەوام بێت لەسەر ئەو هەڵوێستەی، ئەوا ئەمریکا چی پێویست بێت دەیکات بۆ پاراستنی بەرژەوەندییەکانی خۆی و هاوپەیمانەکانی.

وەزیری دەرەوەی ئەمریکا جەختیشی کردەوە، وڵاتەکەی بە هیچ جۆرێک رێگە نادات ئێران کۆنتڕۆڵی گەروی هورمز بکات یان ببێتە خاوەنی چەکی ئەتۆمی، چونکە کۆنتڕۆڵکردنی ئەو گەروە دەبێتە پێشینەیەکی مەترسیدار بۆ ناوچەکانی دیکەی جیهانیش.

سوپای پاسداران رایگەیاند، کە هیچ رێگەیەک نییە بۆ ئەوەی سێبەری جەنگ بۆ هەمیشەیی لە وڵاتدا لاببرێت جگە لە "وەستان و سەپاندنی تێچوی قورس بەسەر دەستدرێژکاردا".

ئەمڕۆ چوارشەممە، سوپای پاسدارانی ئێران راگەیەندراوێکی بڵاوکردەوە و تێیدا هاتووە؛  وەک وەڵامێک بۆ دەستدرێژییەکانی دوژمن، هێرشیان کردوەتە سەر ئوردن و بەحرین.

سوپای پاسداران رایگەیاند، ئەم وەڵامانە بەس نەبن و دەستدرێژییەکان بەردەوام بن ئامادەکاری دەکەن بۆ ئۆپراسیۆنێکی پەشیمانکەرەوە، کە دواتر راگەیاندنی ماتەمینی گشتی لە ئەمریکادا دەبێت.

لە راگەیەندراوەکەدا ئاماژەی بەوەشکردوە ئۆپراسیۆنی سزادانی دەستدرێژکاران بەردەوامە، چونکە ئەگەر دەستدرێژکارەکە سزا نەدرێت و تێچووی قورس نەدات بەهۆی شکاندنی بەڵێنەکان و پێشێلکردنی رێککەوتنەکان، ئەوا بیر لەوە دەکاتەوە کە هەرکاتێک بیەوێت دەتوانێت جەنگ دەستپێبکاتەوە.

سەردار شێکارچی، وتەبێژی باڵای هێزە چەکدارەکانی ئێران، رایگەیاند لە بیروڕای گشتی ئێراندا نابێت پرسی تۆڵەسەندنەوە یان  روشتنی خوێن لە ئۆپراسیۆنێکی تاکتیکی و زۆر رووکەشدا کورت بکرێتەوە، بەڵکو ستراتیژی ئێمە دەرکردنی ئەمریکییەکانە لە ناوچەی رۆژئاوای ئاسیا.

وتەبێژی باڵای هێزە چەکدارەکانی ئێران  ئاماژەی بەوەشکردوە، دوژمنان بە هەموو کەرەستەی کۆکردنەوەی هەواڵگری سەریان لێ شێواوە و نازانن لە کوێ مووشەک بەرهەم دەهێنن.

ناوبراو راشیگەیاندوە،  نزیکەی 20 ساڵ ناوەندێک بە ناوی "ناوەندی داتا" لە ئیمارات بە هاوکاری ئەمریکییەکان و ئەوروپییەکان و ئیسرائیل  دامەزراوە بۆ کۆنترۆڵکردنی تەواوی ناوچەی رۆژئاوای ئاسیا و تەنانەت بەشێکی جیهانیش، بەڵام ئێران لەناوی برد.

لەبارەی بەرهەمهێنانی چەکەوە سەردار شێکارچی دەڵێت؛ لەماوەی 40 رۆژی جەنگ و پێشێلکردنی بەڵێن دوای ئیمزاکردنی یاداشتەکە، بەرهەمهێنانی موشەکی ستراتیژییان هەرگیز نەوەستاندوە و دوژمنیش هەرگیز نازانێ لە کوێ موشەکەکانیان بەرهەمدەهێنن.

ناوبراو جەختیشیکردوەتەوە، ئەوان بە دوای تۆڵەوەن و تۆڵەکردنەوەش نابێت روکەش بێت؛ تۆڵەی ئەوان دەرکردنی ئەمریکایە لە ناوچەکە.