وەزارەتی بەرگریی روسیا تێکشکاندنی هێرشێکی بەرفراوانی ئۆکراینی رادەگەیەنێت و ئاشکرای دەکات، شەوی رابردوو سیستمی بەرگریی ئاسمانیی وڵاتەکەی 389 فڕۆکەی بێفڕۆکەوانی لە ئاسمانی چەندین هەرێمی جیاواز و دەریای رەشدا خستووەتە خوارەوە.

وەزارەتی بەرگریی روسیا، ئەمڕۆ شەممە، ئاشکرایکرد، سیستمی بەرگریی ئاسمانیی وڵاتەکەی توانیویەتی 389 فڕۆکەی بێفڕۆکەوانی (درۆن) ئۆکراین بخاتە خوارەوە.

وەزارەتی بەرگریی روسیا لە راگەیەنراوێکدا ئاماژەی بەوەکرد، شەوی رابردوو هێزەکانی بەرگریی ئاسمانی توانیویانە ئەو ژمارە زۆرەی درۆنەکانی ئۆکراین لە ئاسمانی چەندین هەرێم و ناوچەی جیاوازی باشور و رۆژئاوای وڵاتەکەدا تێکبشکێنن و بیخەنە خوارەوە.

بەپێی راگەیەنراوەکە، فڕۆکە بێفڕۆکەوانەکان لە ئاسمانی هەرێمەکانی (بێلگۆرۆد، بریانسک، ڤلادیمیر، کالوگا، کورسک، لیپیتسک، لێنینگراد، نۆڤگۆرۆد، ئۆریۆل، پسکۆڤ، رۆستۆڤ، ریازان، ساراتۆڤ، سمۆلێنسک، تڤێر، تولا)، لەگەڵ هەرێمی کراسنۆدار، مۆسکۆ، نیمچە دوورگەی قرم، دەریای ئازۆڤ و دەریای رەشدا خراونەتە خوارەوە.