بافڵ جەلال تاڵەبانی، سەرۆکی یەکێتیی نیشتمانیی کوردستان، بە یاوەریی هەڤاڵ رەفعەت عەبدوڵا، جێگری سەرۆکی یەکێتی، سەردانی خاتوو لاڤە حیکمەت، سەرپەرشتیاری یەکێتیی ژنانی کوردستانی کرد.
 
لەو سەردانەدا سەرۆک بافڵ پیرۆزبایی لە هەڤاڵ لاڤە حیکمەت کرد بۆ دەستپێکی کار و قۆناغی نوێی یەکێتیی ژنانی کوردستان وەک هەنگاوێکی زیاتر بۆ خزمەتکردنی پرسی ژنان، هاوکات وەک هەمیشە پاڵپشتی و پشتیوانی تەواوی بۆ سەرخستنی ئەرکەکانیان دەربڕی.
 
سەرۆکی یەکێتی بە گرنگیشەوە لە رۆڵی ژنان و یەکێتییەکەی روانی بۆ زیاتر خزمەتکردنی پرسی ژنان و وتی: یەکێتیی نیشتمانیی کوردستان باوەڕی تەواوی بە یەکسانی ژن و پیاو هەیە و هەموو هەوڵێکیشمان بۆئەوەیە ژنان بەشێکی گرنگ و کاریگەری ژیانی رێکخراوەیمان بن و لە ناوەندی بڕیاردا بونیان هەبێت. بۆ داهێنان و هەنگاوی گەورەتر دەرگای یەکێتی بۆ هەموو ژنانی کوردستان کراوەیە تا لەژێر ئەم رۆشناییەدا کاربکەن و تواناکانیان بخەنە خزمەتی گەشەپێدانی وڵاتەکەمانەوە.
هەڤاڵ رەفعەت عەبدوڵاش دووپاتی لە بەردەوامی پشتیوانی هەموو ئۆرگانەکانی یەکێتی بۆ سەرخستنی خەباتی ژنان و یەکێتییەکەیان دووپاتکردەوە و وتی پێکەوە بەرەوە هەنگاوی گەورەتر و زیاتر خزمەتکردن بە پرسەکانی ژنان هەنگاو دەنێین.
 
لەبەرانبەردا خاتوو لاڤە حیکمەت سوپاسی ئەو پشتیوانییەی کرد و بەڵێنی دا قۆناغی نوێی کارکردنی یەکێتیی ژنانی کوردستان بە پێی پێویستی خواست و داواکاری و کێشەکانی ئەمڕۆی ژنان بێت و جەختیکردەوە دور لە ئینتمای حزبی کار لەسەر پرسی ژنان دەکەن و هەموو کارو پرۆژەکانیان هەر لە چوارچێوەی خزمەتکردن بە پاراستنی مافی ژنان و رەخساندنی کەشێکی لەبارتردەبێت لەبەردەمیان تا پێکەوە هەنگاوێکی نوێ بنێین بۆ داهاتوویەکی گەشتر بۆ ژنانی نیشتمانەکەمان.