ئەمینداری گشتی عەسائیب ئەهلی حەق دەڵێت هیچ پەیوەندییەكی بە راگرتن و بڕینی موچەی مووچەخۆرانی هەرێمی كوردستانەوە نییە.

قەیس خەزعەلی ئەمینداری گشتی بزوتنەوەی عەسائیب ئەهلی حەق رەتیكردەوە هیچ پەیوەندییەكی هەبێت بە راگرتنو بڕینی موچەی فەرمانبەرانی هەرێمی كوردستان، وتیشی ئەوەی بەشێك لە میدیاكانی هەرێم بڵاویانكردووەتەوە كە ئەو هۆكاری بڕینی موچە بووە، دوورە لە راستیەوە.

وتیشی، بەرپرسیارێتی بەڕێوەبردنی دەوڵەت هاوبەشیە، ناكرێت ئەركی یەكێك بەسەر یەكێكی دیكەدا بسەپێنرێت، هەموو عێراقییەكانیش بەبێ جیاوازی ماف و ئەركیان هەیە.

لە قسەکانیدا قەیس خەزعەلی ئاماژەی بە رێژەی هەژاری دا لە هەرێم و وتی، "رێژەی هەژاری لە هەرێمی کوردستان لە ناوەڕاست و باشوری عیراق زیاترە. ئامارە رەسمییەکان دەڵێن زۆربەی پەنابەرە عێراقییەکان لە دەرەوەی وڵات، خەڵکی هەرێمی کوردستانن."

هاوکات لە بەشێکیتری قسەکانیدا رەخنەی لە بەرپرسانی هەرێمگرت و وتی؛"حکومەتی هەرێمی کوردستان داهاتی نەوت رادەستی بەغدا ناکات و بە نرخی خۆڵ دەیفرۆشێت، داهاتی دەروازە فەرمی و نافەرمییەکانیش رادەستی بەغدا ناکات."