سەرۆکی ئۆکراین ڤۆلۆدیمیر زیلینسکی راگەیاند زیاتر لە 300 سەربازی وڵاتەکەی کە لەلایەن هێزەکانی روسیاوە بە دیل گیرابوون، ئازاد کراون و گەڕاونەتەوە ماڵەوە.

ئەم ئازادکردنە لە چوارچێوەی دووەم رۆژی گۆڕینەوەی دیلەکانی نێوان ئۆکراین و روسیادا دێت.

زیلینسکی لە پەیامێکی ڤیدیۆیی تایبەتدا ئاشکرایکرد کە زۆرینەی ئەو سەربازانەی ئازادکراون لە هەرێمی دۆنێتسک بەدیل گیرابوون، هەروەها ئاماژەی بۆ ئەوە کرد کە هەندێک لەو سەربازانە لە ساڵی 2022ەوە لە دەستی هێزەکانی روسیادا بوون.

سەرۆکی ئۆکراین جەختیکردەوە: "ئەرکی ئێمە ئەوەیە هەموو ئەو کەسانە بە تەواوی بگەڕێنینەوە ماڵەوە کە ئێستا لە روسیا دەستبەسەرن. ئەمە ئەرکێکی هاوبەشە بۆ دەزگا هەواڵگرییەکانمان، بۆ دیپلۆماتەکانمان و تەواوی دەوڵەتەکەمان."

هەروەها زیلینسکی دانیپێدانا، کە ئەم پرۆسەیە ئاسان نییە، بەڵام پێویستە جێبەجێ بکرێت.

ئۆکراین و روسیا رۆژی هەینی هەریەکەیان کۆی گشتی 390 سەرباز و هاووڵاتیی مەدەنیان ئازاد کرد.

سەرچاوەکان ئاماژە بەوە دەکەن کە چاوەڕوانی ئەوە دەکرێت رۆژی یەکشەممە دیلی زیاتر ئاڵۆگۆڕ بکرێن.

گفتوگۆکانی ئاڵۆگۆڕی دیلەکان لە سەرەتای ئەم مانگە لە شاری ئیستەنبوڵ دەستیان پێکرد، کە لەو گفتوگۆیانەدا کیێڤ و مۆسکۆ رێککەوتن لەسەر ئاڵوگۆڕکردنی هەزار دیلی جەنگ و دەستبەسەری مەدەنی لە هەر دوو لاوە.

لە لایەکی تر، ئاڵوگۆڕی دیلەکان چەند سەعاتێک دوای هێرشێکی بەرفراوانی درۆن و موشەکی روسیا بۆ سەر کیێڤ ئەنجام درا کە لانیکەم 15 کەسی بریندار کرد.

وەزارتی بازرگانی عیراق دەڵێت، زیاتر لە دوو ملیۆن تۆن گەنمیان لە جوتیاران وەرگرتووە و پێشبینیش دەكەن بۆ ئەمساڵ نزیكەی پێنج ملیۆن تۆن گەنم وەربگرن. 

حەیدەر نوری بەڕێوەبەری كۆمپانیای گشتی بازرگانی دانەوێڵەی عیراق ئاشكرایكرد، بڕی گەنمی وەرگیراو تائێستا گەیشتووەتە زیاتر لە دوو ملیۆن تۆن و پێشبینی دەكەن تاكو كۆتایی وەرزی كۆكردنەوەی بەرهەم بڕەكە بگاتە نزیكەی چوار بۆ پێنج ملیۆن تۆن.

وتیشی، ئەو بڕە گەنمەی كە ساڵی رابردوو لە كۆگاكاندا ماوەتەوە زیاترە لە دوو ملیۆن تۆن. 
وەزارەتی بازرگانی عیراق پێشتر ئاماژەی بەوەكرد كە لیژنەیەكی ناوەندیی بۆ بە بازاڕكردن و "كۆنتڕۆڵی جۆریی" بۆ پرۆسەی وەرگرتنی بەرهەمی گەنمی ئەمساڵ دروستكراوە.

نوێنەری تایبەتی دۆناڵد ترامپ بۆ سوریا لە تورکیا لەگەڵ سەرۆکی سوریا کۆبووەوە و تاوتوێی جێبەجێکردنی بڕیاری هەڵگرتنی سزا ئابوریەکانی سەر سوریایان کرد.

وردەکاری کۆبوونەوەکە:

تۆم بارەک، باڵیۆزی ئەمەریکا لە تورکیا و نوێنەری تایبەتی ترەمپ بۆ سوریا، ئەمڕۆ شەممە لە راگەیەنراوێکدا ئاشکرای کرد: "لە ئیستەنبوڵ لەگەڵ ئەحمەد شەرع، سەرۆکی نوێی سوریا و ئەسعەد شیبانی، وەزیری دەرەوەی وڵاتەکە کۆبوومەوە."

بارەک ئاماژەی بەوە کرد کە "تاوتوێی جێبەجێکردنی بڕیارەکەی ترەمپمان کرد بۆ هەڵگرتنی سزا ئابوریەکانی سەر سوریا و دوبارە گەڕانەوەی خۆشگوزەرانی و ئاشتی بۆ وڵاتەکە."

ئامانجی هەڵگرتنی سزاکان:

نوێنەری ئەمریکا باسی لەوەکرد، کە ئامانج لە هەڵگرتنی سزاکانی سەر سوریا تێکشکاندنی یەکجارەکی رێکخراوی داعشە لە وڵاتەکەدا. هەروەها ستایشی شەرعی کرد بە مەبەستی پەرەپێدانی پەیوەندییەکانی لەگەڵ ئیسرائیل.

سەردانی داهاتوی دیمەشق:

دەزگا راگەیاندنەکانی سوریا ئەمڕۆ بڵاویان کردەوە کە تۆم بارەک، نوێنەری تایبەتی ترەمپ بۆ سوریا، لەم هەفتەیەدا سەردانی دیمەشق دەکات و لەگەڵ ئەحمەد شەرع، سەرۆکی سوریا و ئەسعەد شەیبانی، وەزیری دەرەوەی ئەو وڵاتە کۆدەبێتەوە.

ئەم سەردانەی بارەک دەبێتە یەکەمین سەردانی ناوبراو بۆ سوریا لە دوای هەڵگرتنی سزاکانی سەر ئەو وڵاتە بە بڕیارێکی ترەمپ کە لە سعودیەدا رایگەیاندبوو.

ڕۆژی هەینی 23ی پێنج ی 2025، تۆم بارەک لە تۆڕی کۆمەڵایەتیی (ئێکس) رایگەیاند کە هەڵگرتنی سزا ئابوریەکانی سەر سوریا لەلایەن سەرۆکی ئەمریکاوە، دەبێتە هۆی تێکشکاندنی رێکخراوی داعش بەتایبەتی لەو وڵاتە.