ناسر کەنعانی وتەبێژی وەزارەتی دەرەوەی ئێران لە کۆنفڕانسی ڕۆژنامەوانی ھەفتانەی خۆیدا ڕایگەیاند، لە گفتوگۆیەکی تەلەفۆنی نێوان ھەردوو وەزیری دەرەوەی ئێران و عێراق، وەزیری دەرەوەی عێراق بە ھاوتا ئێرانییەکەی ڕاگەیاندووە، شازادە محەمەد بن سەلمان، پشتیوانی گفتوگۆی سیاسی و ئاشکرای نێوان تاران و ڕیاز دەکات.

کەنعانی لە بەرامبەر ھەڵوێستی لێپرسراوانی باڵای سعودیە، جەختیکردەوە، ئەوانیش ھەمان بۆچوونیان ھەیە و ئێستاش زەمینە گونجاوە، بۆ دەستپێکردنی گفتوگۆکان بەشێوەیەکی ئاشکرا و فەرمی.

کەنعانی ستایشی ھەڵوێستی عێراقی کرد، کە ڕۆڵی کاریگەریی ھەبووە لە لێکنزیکردنەوەی ھەردوو وڵات، کە توانیویانە چەند خولێکی سەرکەوتووی وتوێژ بەڕیوەبەرن.