لیژنەی ئاسایش و بەرگری لە پەرلەمانی عیراق ئامادەکردنی رەشنووسی دووەمین هەمواری یاسای خزمەت و خانەنشینی هێزەکانی ئاسایشی ناوخۆی کۆتایی پێهێنا، بە مەبەستی خستنەڕووی بۆ خوێندنەوەی یەکەم لەم وەرزەی یاسادانانەدا.

عوسمان شەیبانی، ئەندامی لیژنەی ئاسایش و بەرگری لە پەرلەمانی عیراق، راگەیاند: هەمواره پێشنیازکراوەکە بریتییە لە دیاریکردنی تەمەنی خانەنشینبوونی ئارەزوومەندانە بۆ کارمەندانی هێزەکانی ئاسایشی ناوخۆ لە نێوان 40 بۆ 42 ساڵیدا، بە مەرجێک ماوەی خزمەتی کردارییان لە 15 ساڵ کەمتر نەبێت.

سەبارەت بە ئاستەنگەکان، ئاماژەی بەوە کرد: دەستەی خانەنشینی بەهۆی نەبوونی تەرخانکراوی داراییەوە دژایەتی رەوانەکردنی کارمەندانی وەزارەتی ناوخۆی کردووە بۆ خانەنشینی ئارەزوومەندانە، بەڵام لیژنەی ئاسایش و بەرگری بۆ یەکلاکردنەوەی بابەتەکە دەستوەردانی کردووە و پڕۆژەیاساکە لەم وەرزەی یاساداناندا دەخرێتە بەردەم خوێندنەوەی یەکەم.

 

 

لە رێکارێکی نوێدا بۆ بەرەنگاربوونەوەی هاوکارییە لۆجیستییەکانی تاران، وەزارەتی گەنجینەی ئەمریکا سزای خستە سەر 36 کەسایەتی و دامەزراوەی پەیوەندیدار بە کەرتی فڕۆکەوانیی ئێرانییەوە، کە لە نێویاندا کەسێک و 29 کۆمپانیای جۆراوجۆر دەستنیشان کراون.

بەپێی قاگەیەندراوی وەزارەتەکە، ئەم لایەنانە تۆمەتبارن بە پشتیوانیکردنی ئەو تۆڕە فڕۆکەوانییەی ئێران کە بۆ گواستنەوەی چەک و کەلوپەلی قاچاخ بەکاردەهێنرێن.

لە هەمان کاتدا، واشنتۆن بڕیاریدا کارکردن بەو مۆڵەتە تایبەتە بۆ ماوەیەکی نادیار رابگرێت کە پێشتر بەشێوەیەکی کاتی رێگەی دەدا بە دووبارە هەناردەکردنەوەی هەندێک فڕۆکەی مەدەنی بۆ ناو خاکی ئێران.

 

 

 

حکومەتی هەرێم بڵاویکردەوە، ئەمڕۆ سێشەممە، وەفدێکی باڵای حکومەتی هەرێمی کوردستان گەیشتە شاری بەغداد، بۆ ئەنجامدانی زنجیرەیەک کۆبوونەوە لەگەڵ وەزارەتە پەیوەندیدارەکانی حکومەتی فیدراڵ.

حکومەتی هەرێمی کوردستان لە راگەیەنراوێکدا بڵاویکردەوە، ئامانجی سەرەکیی سەردانەکە، بەشداریکردنی راستەوخۆی حکومەتی هەرێمی کوردستانە لە ئامادەکردنی رەشنووسی پرۆژەیاسای بودجەی گشتیی فیدراڵ بۆ ساڵی داراییی 2027 و جێگیرکردنی پشک و شایستە دەستوری و داراییەکانی هەرێمی کوردستان لە پرۆژەیاساکەدا.

ئاماژەی بەوەشکرد، بڕیارە وەفدەکە سەرەتا لەگەڵ وەزارەتی دارایی فیدراڵ و دواتریش لەگەڵ وەزارەتەکانی پلاندانان و نەوت کۆببێتەوە.

حکومەتی هەرێم ئەوەشی خستەڕوو، وەفدەکە تێڕوانین و داواکارییەکانی هەرێمی کوردستان سەبارەت بە تەرخانکراوی موچە و شایستە داراییەکانی موچەخۆران و پلە و میلاکی وەزیفی، تەرخانکراوی پرۆژەکانی وەبەرهێنان و پەرەپێدانی پارێزگاکان، تەرخانکراوی بودجەی بەکاربردن و هەروەها دۆسیەی نەوت دەخاتەڕوو.

راشگەیاند، ئامانج لەم کۆبوونەوانە، گەیشتنە بە تێگەیشتن و رێککەوتنێکی هاوبەش لەگەڵ حکومەتی فیدراڵ و جێگیرکردنی ماف و شایستەکانی هەرێمی کوردستان لە بودجەی فیدراڵی ساڵی 2027دا.

بەپێی راگەیەنراوەکەی حکومەتی هەرێم، وەفدەکە پێکدێن لە وەزیرانی دارایی و سامانە سروشتییەکان، سەرۆکی دیوانی ئەنجومەنی وەزیران، سکرتێری ئەنجومەنی وەزیران، سەرۆکی فەرمانگەی هەماهەنگی و بەدواداچوون و بریکاری وەزارەتی پلاندانان.