خەلیل حەییە، سەرکردەی دیاری بزووتنەوەی حەماس، ئاسوودەیی خۆی دەربڕی بەرامبەر بەو دڵنیاییانەی لەلایەن نێوەندگیرەکان و دۆناڵد ترەمپ، سەرۆکی ئەمریکاوە پێیانگەیشتووە کە جەختیان لەسەر کۆتاییهاتنی جەنگی غەززە کردووەتەوە.

حەییە لە لێدوانێکدا بۆ کەناڵی "قاهیرە"ی میسری وتی: "ئەوەی لە نێوەندگیرەکان و سەرۆکی ئەمریکاوە بیستوومانە، دڵنیامان دەکاتەوە کە جەنگی غەززە کۆتایی هاتووە."

ناوبراو ئاماژەی بەوەشکرد، "ویستی نێودەوڵەتی بە سەرپەرشتیی ترەمپ، گەرەنتیی سەرکەوتنی رێککەوتنی ئاشتییە." و کۆنفرانسی ئاشتی لە شەرم شێخ، کە بە ئامادەبوونی ترەمپ بەڕێوەچوو، وەک بەڵگەیەک بۆ کۆتاییهاتنی جەنگ هێنایەوە.

سەرکردەکەی حەماس جەختی لەوە کردەوە کە بزوتنەوەکەی "بە تەواوی متمانە و سوربوونەوە پابەندی جێبەجێکردنی رێککەوتنەکەیە."

لەگەڵ ئەوەشدا، دووپاتیکردەوە کە دۆزینەوە و دەرکردنی تەرمی ئەو 15 بارمتە ئیسرائیلییەی لە کەرتی غەززە ماونەتەوە، کارێکی "زۆر قورسە". وتیشی: "ئێمە بە جددی کار بۆ دەرکردنی هەموو تەرمەکان دەکەین، بەڵام روبەروی سەختییەکی زۆر دەبینەوە،" ئاماژەی بەوەشدا کە پێویستیان بە کات و کەرەستەی زیاترە.

ئەمە لە کاتێکدایە کە دۆناڵد ترەمپ لە دوایین لێدوانیدا هەڕەشەی "لەناوبردنی" حەماسی کردبوو ئەگەر پابەندی رێککەوتنەکە نەبن. 

وەزارەتی خوێندنی باڵا و توێژینەوەی زانستیی حکومەتی هەرێمی کوردستان، لە بڕیارێکی نوێدا مۆڵەتی سێ مانگی بەخشییە ئەو قوتابی و خوێندکارانەی کە تازە لە زانکۆ و پەیمانگەکان وەرگیراون، بە مەبەستی وەرگرتنی ژمارەی کەسیی بێهاوتا (UPN) و تۆمارکردنی لە سیستمی ئەلیکترۆنی  زانکۆ.

بەپێی گشتاندنێکی رەسمی کە وەزارەت ئاراستەی سەرجەم زانکۆ حکومی و تایبەتەکانی کردووە، ئاماژە بەوە کراوە کە ئەم بڕیارە لەسەر فەرمانی د. ئارام محەمەد قادر، وەزیری خوێندنی باڵا و توێژینەوەی زانستی دەرچووە.

وەک لە نووسراوەکەدا هاتووە ئامانج لەم بڕیارە، خێراکردن و ئاسانکردنی مامەڵەی قوتابییانە، هەروەها رێگریکردنە لە دروستبوونی قەرەباڵغی و کێشە لەکاتی پرۆسەی خۆتۆمارکردندا.

بڕیارەکە جەخت لەوە دەکاتەوە کە پێویستە قوتابییە نوێیەکان لە ماوەی سێ مانگدا سەردانی سەنتەرەکانی بایۆمەتری بکەن بۆ وەرگرتنی ژمارەی (UPN) و دواتر لە سیستمی (Zanko) تۆماری بکەن، ئەمەش وەک هەنگاوێکی پێویست بۆ تەواوکردنی رێکارەکانی وەرگرتنیان لە زانکۆ.

میری ریگیڤ، وەزیری گواستنەوەی ئیسرائیل، رایگەیاندووە کە پێشنیازی کردووە تەرمی یەحیا سینوار، سەرکردەی حەماس بسوتێندرێت، کە نزیکەی ساڵێک لەمەوبەر لە رەفەح کوژرا.

ریگیڤ لە چاوپێکەوتنێکدا لەگەڵ رادیۆیەکی توندڕەوی ئیسرائیلی ئاشکرایکرد، کە ئەو پێشنیازەی لە کۆبوونەوەی ئەنجومەنی وەزاریی ئاسایشی ئیسرائیلدا خستووەتەڕوو.

وەزیرە ئیسرائیلییەکە بەراوردکاریی لەنێوان سینوار و ئوسامە بن لادن، سەرکردەی رێکخراوی قاعیدەدا کرد و وتی: "پێموابوو دەبێت ئێمە هەمان ئەو کارە بکەین کە ئەمریکییەکان لەگەڵ بن لادن کردیان. من ئەم پێشنیازەم لە ئەنجومەنی وەزیراندا کرد. هەندێک سیمبول هەن کە نابێت بگەڕێندرێنەوە."

ناوبراو وتیشی: "نەمدەویست لە هیچ قۆناغێکدا ببینم سینوار بە خاک دەسپێردرێت."

بەپێی رۆژنامەی "یەدیعوت ئەحرۆنۆت"ی ئیسرائیلی، پێدەچێت پێشنیازەکەی ریگیڤ "لەلایەن بەرپرسانی ئەمنییەوە لێکۆڵینەوەی لەسەر بکرێت"، بەڵام خودی وەزیرەکە رایگەیاندووە کە بیرۆکەکەی لە کۆبوونەوەکەدا گفتوگۆی لەسەر نەکراوە.

ئەمە لە کاتێکدایە کە بەپێی رۆژنامەی "وۆڵ ستریت جۆرناڵ"، حەماس داوای وەرگرتنەوەی تەرمی یەحیا سینوار و محەمەدی برای دەکات. پێشتریش بەرپرسێکی ئیسرائیلی بە "سی ئێن ئێن"ی راگەیاندبوو کە "تەرمی براکانی سینوار بەشێک نابن لە رێککەوتنی ئێستا" بۆ کۆتاییهێنان بە جەنگ.