قائیمقامیەتی سلێمانی لەبارەی دیاریکردنی نرخی کارەبای موەلیدە راگەیەنراوێکی بڵاوکردەوە و تێیدا هاتووە: ئەوەی لە میدیاکانەوە بڵاوکراوەتەوە بێ بنەمایە و هێشتا نرخمان دیارینەکردووە.

لە راگەیەنراوەکەی قائیمقامیەتی سلێمانیدا ئەوەش هاتووە: هاووڵاتیانی خۆشەویستی شاری سلێمانی ئاگاداردەکەینەوە کە تائێستا نرخی موەلیدە بەشێوەی رەسمی دیارینەکراوە و ئەو هەواڵانەی کە لە چەند میدیا و پەیجێکەوە بڵاوکراونەتەوە بەتەواوی ناڕاست و بێ بەها و بێ بنەمان، ئەو نرخانەش کە باسکراوە ناڕاست و چەواشەکارانەیە.

ئەوەشی ئاشکرا کردووە، هەموو لایەک دڵنیادەکەینەوە بۆ دیاریکردنی نرخی موەلیدە کۆبوونەوەی رەسمی لایەنە پەیوەندیدارەکان دەکرێت و رەوشی دارایی هاووڵاتیان رەچاودەکرێت.

جەختیشی کردووەتەوە: لەکاتی دیاریکردنی نرخی کارکردنی موەلیدە ئەهلییەکان بەڕەسمی لەلایەن قائیمقامیەتی قەزای مەڵبەندی سلێمانیەوە بۆ رای گشتی بڵاودەکرێتەوە.