پۆلیسی هەولێر رایدەگەیەنێت، بەکارهێنانی وشەی نەشیاو و جنێودان و سوکایەتیکردن بە یەکتر لە تۆڕە کۆمەڵایەتییەکان رێگەپێدراو نییە، هەروەها ئەو کەسانەی ڵایڤ دەکەنەوە پێویستە بەڵێننامە پڕبکەنەوە.

بەڕێوەبەرایەتی پۆلیسی پارێزگای هەولێر راگەیەنراوێكی بڵاوکردەوە و تێیدا ئاماژەی بەوەکرد، بۆ پاراستنی دابونەریت و کلتوری کۆمەڵایەتی و رێگریکردن لە دیاردە نەخوازراوەکان؛ بەکارهێنانی وشەی نەشیاو و جنێودان و سوکایەتیکردن بە یەکتر یان بڵاوکردنەوەی وێنە و ناوەڕۆکی نەگونجاو لە تۆڕە کۆمەڵایەتییەکان بە تەواوی قەدەغەیە.

ئاماژەی بەوەشکردووە، ئەو جۆرە رەفتارانە جگە لەوەی دژ بە بەها کۆمەڵایەتییەکانن، دەبنە هۆی دروستبوونی کێشە و تاوانی جۆراوجۆر، بەوهۆیەوە هەرکەسێک سەرپێچی بکات رووبەڕووی لێپرسینەوەی توندی یاسایی دەبێتەوە.

لە بەشێکی دیکەی راگەیەنراوەکەدا، پۆلیسی هەولێر وادەیەکی دیاریکردووە و بەپێی ئەوەش، پێویستە لە ماوەی 15 رۆژدا ئەو کەسانەی لە تۆڕە کۆمەڵایەتییەکاندا بە تایبەت لە پلاتفۆرمی 'تیکتۆک' لایڤ ئەنجام دەدەن، سەردانی بەڕێوەبەرایەتی پۆلیسی پارێزگای هەولێر بکەن بەمەبەستی دروستکردنی دۆسیەی تایبەت و پڕکردنەوەی بەڵێننامە و وەرگرتنی رێنماییەکان.

لەکۆتاییدا، پۆلیسی هەولێر جەختی کردووەتەوە، هەر کەسێک لە ماوەی دیاریکراودا پابەند نەبێت، خۆی بەرپرسیار دەبێت لە بەرانبەر یاسادا و رێکاری پێویستی بەرانبەر دەگیرێتەبەر.

راوێژکاری رابەری باڵای ئێران رایدەگەیەنێت، تەنها لەو کاتەدا گەروی هورمز دەکەنەوە، کە ئەمریکا بە تەواوی و بە روونی وەڵامی سەرجەم مەرجەکانی ئێران بداتەوە و کاریان پێبکات.

موحسین رەزایی، راوێژکاری رابەری باڵای ئێران، لە پەیامێکدا لە تۆڕی کۆمەڵایەتیی ئێکس هەڵوێستی تاران بەرانبەر بە ئەمریکا راگەیاند و جەختی کردەوە، وەڵامەکانی واشنتۆن بۆ ماف و داواکارییەکانی ئێران بڕواپێکەر نەبوون.

ئاماژەی بەوەشكرد، دەبێت ئەمریکا بە تەواوی و بە روونی وەڵامی مەرجەکانی ئێران بداتەوە و کاری پێبکات، تەنها لەو کاتەدا گەروی هرمز دەکەنەوە، لە دەرەوەی ئەوەش هیچ دانوستانێکی نوێ لە ئارادا نابێت.

وەزیری دادی عیراق باس لە کۆبوونەوەیان لەگەڵ سەرۆک وەزیران دەکات و رایگەیاندووە، " بە سوپاسەوە جەنابی سەرۆک وەزیران چەند بڕیارێکی گرنگی بۆ کەرکوک دەرکرد".

د. خالد شوانی وەزیری دادی عیراق رایگەیاندووە: لە کۆبوونەوەی ئەمڕۆماندا لەگەڵ جەنابی سەرۆک وەزیران عەلی زەیدی، دوای تاوتوێکردنی کێشەی کەمیی کارەبا و نیگەرانییەکانی هاووڵاتیانی شارەکە، بە سوپاسەوە جەنابی سەرۆک وەزیران چەند بڕیارێکی گرنگی بۆ کەرکوک دەرکرد؛ دابینکردنی 5 ملیۆن لیتر گاز و زیادکردنی 150 مێگاوات کارەبا بۆ چارەسەرکردنی بنەڕەتیی کێشەی کارەبا و دابینکردنی هەلی کار بۆ خەڵکی کەرکوک لەلایەن ئەو کۆمپانیا بیانییانەی کە لە پارێزگاکەدا کار دەکەن.

وەزیری دادی عیراق ئاماژەی بەوەشداوە: بەناوی خۆمان و نوێنەرانی کەرکوکەوە، سوپاس و پێزانینی زۆرمان ئاڕاستەی جەنابی سەرۆک وەزیران دەکەین بۆ هاوکاری و بەدەنگەوەهاتنی بەردەوامی بەمەبەستی چاککردنی دۆخی شارەکەمان.