جۆزێ مۆرینیۆ، راهێنەری پرتوگالی دوای زیاتر لە 10 ساڵ وەک راهێنەری نوێ گەڕایەوە یانەی ریاڵ مەدرید.

راهێنەرە پرتوگالیەکە ساڵی 2010 تا 2013 راهێنەری یانەی ریاڵ مەدرید بوو، لەوکاتەدا روبەڕووی چەندین ئاڵەنگاری بووەوە بەهۆکاری ئەوەی ریاڵ مەدرید لە بارودۆخێکی باشدا نەبوو، بەڵام جۆزێ هەرچەند نەیتوانی خولی یانە پاڵەوانەکانی ئەوروپا بەدەستبهێنێت، بەڵام یانەی ریاڵ مەدریدی بردە قۆناغێکی دیکە.

مۆرینیۆ لەگەڵ یانەی ریاڵ مەدرید توانی نازناوی خولی ئیسپانی، جامی شای ئیسپانیا و جامی سوپەری ئیسپانیا بەدەستبهێنێت، لەو وەزرەشی کە خولی ئیسپانی بەدەستهێنا یانەکەی توانی 100 خاڵ کۆبکاتەوە و 121 گۆڵ تۆماربکات کە ئەوە ژمارەیەکی پێوانەیی نوێ بوو.

مۆرینیۆ دوای ریاڵ مەدیرد، راهێنەری هەریەک لە یانەکانی، چێڵسی، مان یونایتد، تۆتنهام، رۆما، فەنەرباخچە و بەنفیکای کرد، دواجاریش ئەمڕۆ 16ـی 5ـی 2026 گەڕایەوە یانەی شاهانە.

گەڕانەوەی مۆرینیۆ لەکاتێکدایە کە یانەی ریاڵ مەدرید بە چەندین کێشەوە دەتلێتەوە، دیارترینیان ژوری جلگۆڕینی یانەکەیە کە لە چەند هەفتەی رابردوودا دوو یاریزانی یانەکە کردیان بەشەڕ و دەنگدانەوەیەکی زۆری لە میدیاکانی جیهاندا دروست کرد.

ریاڵ مەدرید دوو وەزری لەسەر یەکە هیچ نازناوێک بەدەست ناهێنێت، ئەمەش یانەکەی خستووەتە ژیر فشارێکی قورس، چونکە یانەی شاهانە خاوەنی زۆرترین نازناوی خولی ناوخۆی ئیسپانیا و یانە پاڵەوانەکانی ئەوروپایە، بەڵام لە کۆتا دوو وەرزدا، لە هیچ نازناوێک نزیک نەبووەتەوە.

جۆزێ مۆرینیۆی پرتوگالی لەئێستادا تەمەنی 63 ساڵە و ئەزمونێکی زۆری لە کاری راهێنەرایەتیدا کۆکردووەتەوە، هەرچەند لە 10 ساڵی رابردوودا بەپێی پێویست سەرکەوتوو نەبووە لەگەڵ ئەو یانانەی کە راهێنەرایەتی کردوون، بەڵام هاندەرانی ریاڵ مەدرید دڵخۆشن بە گەڕانەوەی مۆرینۆ و چاوەڕێدەکەین یانەکەیان رێکبخاتەوە و بیانگەڕێنێتەوە سەر سەکۆی نازناوەکان.

فەرماندەی بارەگای خاتەمولئەنبیا هۆشداری توند دەداتە ئەمریکا و رایدەگەیەنێت، ئەگەر واشنتۆن هێرش بکاتە سەر وڵاتەکەی، ئاگری جەنگە تەواوی ناوچەکە و جیهان دەگرێتەوە و رێگری لە هەناردەکردنی نەوتیش دەکەن.

فەرماندەی خاتەمولئەنبیای سەر بە هێزە چەکدارەکانی ئێران هۆشداری توند دەداتە ئەمریکا و رایدەگەیەنێت، ئەگەر ئەمریکا جارێکی دیکە هێرش بکاتەوە سەر ئێران، وەڵامەکەیان زۆر توندتر دەبێت لە جاران و ئاگری ئەم شەڕەش تەنها لە ناوچەکەدا قەتیس نامێنێت، بەڵکو بە شێوازێکی بەربڵاوتر پەرەدەسێنێت.

ئاماژەی بەوەش کردووە، کە سیاسەتی ئەمریکا لە ناوچەکەدا تووشی دژایەتییەکی ئاشکرا بووە؛ چونکە لە لایەکەوە باس لە رێککەوتن و دانوستان دەکەن و لە لایەکی دیکەشەوە دەست دەکەن بە تێکدان و توندوتیژی، ئەم دژایەتییە لە رەفتار و گوتاری ئەمریکاشدا بە هۆکاری سەرەکیی ناسەقامگیریی ناوچەکە و مەترسی بۆ سەر ئاسایشی بازرگانی و ئابووریی نێودەوڵەتی، بەتایبەتی لە گەروی هورمزد دادەنرێت.

لە بەشێکی دیکەی پەیامەکەیدا رایگەیاندوە، سەرکردەکانی ئەمریکا بەهۆی شارەزانەبوون  و نەناسینی گەلی ئێران و هێزە چەکدارەکانی، کەوتوونەتە ناو خولگەیەکی پووچەوە و پشتبەستن بە درۆی بەردەوام نیشانەی ئەم بێسەروبەرییەیە.

فەرماندەی بارەگای خاتەمولئەنبیا جەختی لەوە کردووەتەوە، کە واشنتۆن ناتوانێت لە رێگەی پڕوپاگەندە و جەنگی راگەیاندنەوە شکستە یەک لەدوای یەکەکانی خۆی لە بەرانبەر ئێراندا بشارێتەوە.

 لە کۆتاییشدا بە ئاماژەدان بە هەڕەشەکانی ئەم دواییەی ئەمریکا بۆ سەر ژێرخانی نەوتی ئێران، هۆشدارییەکی رون و یەکلاکەرەوەی داوە و دەڵێت؛ یان هەناردەکردنی نەوت و گاز بۆ هەمووان دەبێت، یان بۆ هیچ کەسێک رێگەپێدراو نابێت.