لە چوارچێوەی هەوڵەکان بۆ نەهێشتنی هەڕەشە موشەکییەکان، سەرۆک وەزیرانی ئیسرائیل رەوشی رژێمی ئێران بە داڕماو وەسف دەکات و جەخت لەسەر بەردەوامیی گورزە سەربازییەکان دەکاتەوە.

بنیامین ناتانیاهۆ، سەرۆک وەزیرانی ئیسرائیل لە نوێترین پێشهاتەکانی جەنگی دژ بە ئێران رایگەیاند، هێشتا شەڕ کۆتایی نەهاتووە و ئۆپەراسیۆنەکان بۆ سەر تواناکانی ئێران بەردەوامن.

ناتانیاهۆ جەختی کردەوە، موشەکەکانی ئێران چیتر هەڕەشەی جددی نین بۆ سەر ئیسرائیل، چونکە بەشێوەیەکی سیستماتیک ژێرخانی پیشەسازیی سەربازیی ئەو وڵاتەیان تێکشکاندووە.

سەرۆک وەزیرانی ئیسرائیل ئاماژەی بەوەکرد، پایەکانی رژێمی ئێران داڕماون و لە ئێستادا تاران لە هەموو کاتێک لاوازترە.

ناتانیاهۆ ئاشکرایکرد، وڵاتەکەی لە جەنگێکی مێژووییدایە و بە هەماهەنگییەکی تەواو لەگەڵ سوپای ئەمریکا، گورزی کوشندە لە ئێران دەوەشێنن.

وەزارەتی ناوخۆی عیراق رفاندنی كچە رۆژنامەنووسێكی بیانی لە بەغداد لە لەلایەن چەند كەسێكی نەناسراوەوە راگەیاند و دەشڵێت، لێكۆڵینەوە لە روداوەكە دەستیپێكردووە و یەكێك لەو ئەنجامدەرانی تاوانەكەش دەستگیركراوە.

وەزارەتی ناوخۆی عیراق لە راگەیەنراوێكدا بڵاویكردەوە، كچە رۆژنامەنووسێكی بیانی لە بەغداد لەلایەن چەند كەسێكی نەناسراوەوە رفێندراوە، روداوەكەش بەجۆرێك بووە، رفێنرەكان بە ئۆتۆمبێل شوێن ئۆتۆمبێلی رۆژنامەنووسەكە كەوتوون و لەئەنجامدا ئۆتۆمبێلی رۆژنامەنووسەكە وەرگەڕاوە، دواتریش رفێنەرەكان رۆژنامەنووسەكەیان رفاندووە.

ئەوەشی خستووەتەڕو، دەستبەجێ هێزە ئەمنییەكان لێكۆڵینەوەی مەیدانیان لە رووداوەكە دەستپێكردووە و لەسەر بنەمای زانیاری هەواڵگری ورد، توانیویانە رفێنەرێك دەستگیربكەن، هەروەها دەستبگرن بەسەر یەكێك لەو ئۆتۆمبێلانەی تاوانەكەی پێ ئەنجامدراوە.

وەزارەتی ناوخۆی عیراق دڵنیاییش دەدات، لێكۆڵینەوەكان لە روداوەكە بەردەوامە و هەوڵەكانیان چڕكردووەتەوە بۆ رزگاركردنی رۆژنامەنووسە بیانییەكە و دەستگیركردنی سەرجەم رفێنەرەكان.