سکرتێری ئەنجومەنی پشتیوانیی یەکێتیی نیشتمانیی کوردستان، لە پەیامێکدا بەبۆنەی 35یەمین ساڵڕۆژی راپەڕینە مەزنەکەی بەهاری ساڵی 1991، پیرۆزبایی گەرم ئاراستەی کۆمەڵانی خەڵک و هێزەکانی پێشمەرگەی کوردستان دەکات.

لە پەیامەکەدا هاتووە کە راپەڕین دەستکەوتێکی گرنگی شۆڕشی نوێی گەلەکەمان بوو، کە بە رێبەرایەتیی یەکێتی و بە هەماهەنگی لەگەڵ هێز و لایەنە سیاسییەکانی ناو بەرەی کوردستانی لە 5ی ئادار لە شاری رانیەی دەروازەی راپەڕینەوە دەستی پێکرد و لە چەند رۆژێکدا تەواوی دامودەزگا داپڵۆسێنەرەکانی رژێمی بەعسی تێدا تێکشکێندرا.

لە کۆتایی پەیامەکەشدا، سکرتێری ئەنجومەنی پشتیوانیی یەکێتی سڵاو و دروود بۆ گیانی پاکی شەهیدان و قارەمانانی زیندانیی سیاسی و پێشمەرگە دێرینەکان و کەمئەندامانی سەنگەر دەنێرێت، کە بە خوێن و خەبات و پشتیوانیی ئەوان ئەم راپەڕینە سەرکەوتنی بەدەستهێنا.

بافڵ جەلال تاڵەبانی، سەرۆکی یەکێتیی نیشتمانیی کوردستان، لە پەیامێکدا بەبۆنەی 35 ساڵەی راپەڕینەوە، پەیامێکی یەکڕیزی بڵاودەکاتەوە و جەخت لە دوورخستنەوەی ململانێکان لە هەرێمی کوردستان دەکات.

دەقی پەیامەکە:

لە یادی 35 ساڵەی راپەڕینە مەزنەکەی گەلەکەمان، پیرۆزبایی گەرم لە یەک بە یەکی خەڵکە خۆشەویستەکەمان دەکەم. بە وەفادارییەوە لەبەردەم کێلی تێکۆشەرەکانمان سەری رێز دادەنەوێنم و بەڵێن دەدەم هەمیشە لەسەر رێبازەکەیان بەردەوامبم بۆ خزمەتکردن و پاراستنی خەڵک و خاکەکەمان.

راپەڕین کە لە رانیەی خۆشەویستەوە بڵێسەیدا، سەرەتای وەرچەرخان و سەردەمێکی نوێ بوو بۆ گەلەکەمان کە یەکێتی شانازی خاوەندارێتی ئەم دەستکەوتە مێژووییەی پێبڕاوە.

ئێمە لە یەکێتیی نیشتمانیی کوردستان کە ئەندازیاری راپەڕینین، بە شانازییەوە یادی هەموو ئەو قارەمانانەمان دەکەینەوە کە شۆڕشی نوێیان هەڵگیرساند و بۆ ساتێکیش شۆڕشیان جێنەهێشت.

لەم رۆژەدا بەرپرسیارێتی هەموومانە بە پێکەوەیی و رۆحیەتی نیشتمانیی دوور لە دروشم هەنگاو بنێین بۆ چارەسەرکردنی کێشەکانمان و یەک دەنگی و یەک گوتاری گەلەکەمان بنیادبنێینەوە و حکومەتێک دروستبکەین کە خزمەتی خەڵک بکات و لە ئاست داخوازیی و پێویستییەکاندا بێت کە دڵنیام ئەمە باشترین وەفایە بۆ خەڵکەکەمان و ئەو قارەمانانەی راپەڕینیان کرد.

لەم دۆخە هەستیار و ناسەقامگیرەی ناوچەکەمانی پێداتێپەڕدەبێت هەموو هەوڵمان بۆ پاراستنی سەقامگیریی وڵات و دوورخستنەوەی ململانێکانە لە خاکەکەمان.

سڵاو لە گیانی پاکی شەهیدانی راپەڕین و سەرجەم شەهیدانی سەربەرزی کوردستانەکەمان، سەربەرزی بۆ کەسوکارە تێکۆشەرەکانیان.

بافڵ جەلال تاڵەبانی 
سەرۆکی یەکێتیی نیشتمانیی کوردستان