قوباد تاڵەبانی، جێگری سەرۆک وەزیرانی هەرێمی کوردستان، بە مەبەستی دڵنیابوونەوە لە پاراستنی ئاسایش و سەروماڵی هاووڵاتییان لەگەڵ لیژنەی ئەمنی پارێزگای سلێمانی کۆبووەوە.

 لە کۆبوونەوەکەدا جێگری سەرۆک وەزیران ئاماژەی بەوە کرد, کە سەرەڕای بێلایەنی هەرێم، پەرەسەندنی ئاڵۆزییەکانی ناوچەکە کاریگەری نەرێنی دروست کردووە و "پریشکی جەنگ" بەر هەرێمی کوردستان کەوتووە.

لە کۆبونەوەکەدا بڕیاردرا بە پێکهێنانی ژورێکی ئۆپەراسیۆنی هاوبەش لەنێوان هێزە ئەمنییەکان بۆ هەماهەنگی و پاراستنی سەقامگیری.

جگە لە لایەنی ئەمنی، لە کۆبوونەوەکەدا بڕیار لەسەر چارەسەرکردنی کێشەی موەلیدە ئەهلییەکان درا بۆ دابینکردنی کارەبای پێویست بۆ هاووڵاتییان، هاوکات داوا لە هاووڵاتییان کرا لە قەرەباڵخی دوور بکەونەوە.

هەر لە کۆبونەوەکەدا، قوباد تاڵەبانی داوای لە میدیاکان کرد بەرپرسیارانە روماڵی روداوەکان بکەن و پاراستنی ئاسایشی نیشتمانی بخەنە پێش هەموو کارێکی پیشەیی خۆیان و دوور بکەونەوە لە بڵاوکردنەوەی ئەو زانیارییانەی زیان بە ئاسایشی گشتی دەگەیەنن.