وەزارەتی ناوخۆی هەرێم، بڕیارێکی نوێی سەبارەت بە گۆڕینی مۆڵەتی شۆفێری دەرکرد و ئاماژە بەوەکراوە، مەبەست لێی ئاسانکارییە بۆ پەسەندکردنی مۆڵەتی شۆفێری هاووڵاتییە بیانییەکان.

ئەمڕۆ چوارشەممە، وەزیری ناوخۆی حکومەتی هەرێمی کوردستان، بە بڕیاری رێبەر ئەحمەد، وەزیری ناوخۆ، رێنمایی ژمارە (1)ی ساڵی 2026ی ئیمزا کرد، کە تایبەتە بە هەمواری یەکەمی رێنمایی میکانیزمی دەرهێنانی مۆڵەتی شوفێری.

 ئاماژەبەوەکراوە، ئەم بڕیارە نوێیە لەبەر رۆشنایی رێککەوتننامە نێودەوڵەتییەکانی هاتوچۆ دەرچووە و ئاسانکاری دەکات بۆ پەسندکردنی مۆڵەتی شوفێری بیانی.

بەپێی رێنماییە نوێیەکە، میکانیزمێکی نوێ دانراوە بۆ پێدانی مۆڵەتی هەرێمی کوردستان بەو هااوڵاتییە بیانیانەی لە هەرێم نیشتەجێن، ستافی دیپلۆماسی، کونسوڵگەرییەکان و کارمەندانی رێکخراوە نێودەوڵەتییەکان.

هەروەها ئەو هاووڵاتییانەی هەرێمی کوردستان، کە هەڵگری مۆڵەتی شوفێری بیانین، دەتوانن لەسەر هەمان بنەما مۆڵەتی ناوخۆیی دەربکەن، ئەمەش هەنگاوێکە بۆ هاوتاکردنی سیستمەکانی هاتوچۆ لەگەڵ ستانداردە جیهانییەکان.