مەزڵوم عەبدی، فەرماندەی گشتیی هێزەکانی سوریای دیموکرات (هەسەدە) رایدەگەیەنێت، کۆبوونەوەیان لەگەڵ بافڵ جەلال تاڵەبانی، سەرۆکی یەکێتیی نیشتمانیی کوردستان بەرهەمدار بووە و جەخت لە گرنگیی پێکەوە کارکردن دەکاتەوە بۆ بەدیهێنانی داهاتوویەکی باشتر.

مەزڵوم عەبدی لە هەژماری تایبەتی خۆی لە پلاتفۆرمی ئێکس، پۆستێکی بافڵ جەلال تاڵەبانی بڵاوکردووەتەوە و نووسیوێتی، مایەی خۆشحاڵییان بووە لە کۆبوونەوەیەکی بەرهەمدار و بەسووددا چاویان بە سەرۆکی یەکێتی کەوتووە.

ئاماژەی بەوەشکردووە، ئەو هاوبەشی و پێکەوە کارکردنە بۆ بەدیهێنانی داهاتوویەکی باشتر بۆ گەلەکەیان بەرز دەنرخێنن، چونکە ئەو دیدارە هەماهەنگیی هاوبەش بەهێزتر دەکات و رەنگدانەوەی پابەندبوونیانە بە بونیاتنانی پەیوەندییەکی بەهێز و بەرهەمدار.

لە بەشێکی دیکەی پەیامەکەیدا، فەرماندەی گشتیی هەسەدە باسی لەوەشکردووە، هاوکات کۆبوونەوەیەکی دیکەیان لەگەڵ تۆم باراک، نێردراوی ئەمریکا بۆ سوریا ئەنجامداوە و تیایدا گفتوگۆیان لەبارەی دوایین پێشهاتەکانی ناوچەکە و رێککەوتنی 29ی کانوونی دووەم کردووە.

ئەوەشی خستووەتەڕوو، دیدارەکەیان لەگەڵ نێردراوی ئەمریکا دەرفەتێک بووە بۆ ئاڵوگۆڕی بیروڕا لەبارەی رێگەکانی بەهێزکردنی سەقامگیری و ئاسایش لە ناوچەکەدا، هەروەها جەختیان لە پێکەوە کارکردن کردووەتەوە بۆ روبەڕووبوونەوەی ئەو ئاڵەنگارییانەی کە گەلی سوریا پێیدا تێدەپەڕێت.