قوباد تاڵەبانی، جێگری سەرۆکوەزیران پێشوازی کرد لە جیزا ئەندریاس ڤۆن گەیر بریکاری وەزارەتی دەرەوەی ئەڵمانیا و پێکەوە گفتوگۆیان کرد لەبارەی نوێترین پێشهات و گۆڕانکارییەکانی ناوچەکە.

لە کۆبوونەوەکەدا کە رۆژی چوارشەمە(25/2/2026) لە هەولێر بە ئامادەبوونی  دانیال کرێبەر، باڵیۆزی ئەڵمانیا بەڕێوەچوو، ئاڵوگۆڕی بیروڕاکرا لەبارەی رەوشی ناوچەکە.

وەزیری دەوڵەت بۆ کاروباری دەرەوەی ئەڵمانیا ئاماژەی بەوەدا ناوچەکە لەبەردەم هەندێک پێشهات و گۆڕانکاری نوێدایە و رایگەیاند حکومەتی ئەڵمانیا لەگەڵ پاراستنی ئاشتی و سەقامگیری ناوچەکەدایە.

سەبارەت بە رەوشی عیراق، هەردوولا هاوڕابوون کە پێویستە هەنگاوەکانی پێکهێنانی حکومەتی نوێی عیراق خێراتر بکرێت و  جەختیشیان کردەوە دەبێت حکومەتی نوێ  لەم رەوشەدا بەرژەوەندی عیراق بخاتە سەرووی هەموو شتێکەوە و سەروەری و سەربەخۆیی خۆی بپارێزێت، هەروەها وڵات لە هەر چەشنە ئاڵۆزی و ناسەقامگیرییەک بەدوور بگرێت.

لەبارەی هەرێمی کوردستانیشەوە، بە گرنگییەوە باس لە پێویستی یەکدەنگیی کورد لەم قۆناغەدا کرا بۆ ئەوەی هەرێمی کوردستان بتوانێت رۆڵێکی گرنگ ببینێت لە عیراقدا و هاوکاربێت لە پاراستنی ئاسایش و سەقامگیری ناوچەکەدا.

هەر لەم چوارچێوەیەدا باس لە مەترسیی بووژانەوەی رێکخراوی تیرۆریستیی داعش کرا، کە هەڕەشەیەکی جدییە بۆسەر ئاسایشی هەرێم و ناوچەکە و بە پێویست زانرا ئاستی هەماهەنگی و هاوکارییە ئەمنییەکان زیاتر بکرێت.

لە بەشێکی دیکەی کۆبوونەوەکەدا باس لە گرنگیی مانەوەی هێزەکانی ئەڵمانیا لە کوردستان و عێراق کرا و قوباد تاڵەبانی سوپاسی هاوکارییەکانی حکومەتی ئەڵمانیای کرد و بە تایبەت هاوکارییەکانی ئەو وڵاتەی لە بواری راهێنان و یەکخستنەوەی هێزەکانی پێشمەرگەی بەرز نرخاند.