سەعدی ئەحمەد پیرە: کۆبوونەوەکانی لیژنەی باڵای دانوستانی یەکێتی و پارتی پاش جەژن دەستپێدەکەنەوە
رەوەز
٢ی نیسانی ٢٠٢٥
وتەبێژی یەکێتیی نیشتمانیی کوردستان لە لێدوانێکی تایبەت بۆ کوردسات نیوز رایگەیاند، پاش پشوەکانی جەژن، کۆبوونەوەکانی لیژنەی باڵای دانوستانی یەکێتی و پارتی بۆ پێکهێنانی کابینەی نوێی حکومەتی هەرێمی کوردستان دەستپێدەکەنەوە.
سەعدی ئەحمەد پیرەوتەبێژی یەکێتیی نیشتمانیی کوردستان ئاشکرایکرد، کە لە کۆبوونەوەکانی رابردوودا لەسەر ستراتیژی بەڕێوەبردنی هەرێمی کوردستان رێککەوتن کراوە و چاوەڕێدەکرێت لە کۆبوونەوەکانی داهاتوودا لەسەر کۆی بڕگەکانی پێکهێنانی حکومەت بگەنە رێککەوتن.
هەروەها وتەبێژی یەکێتیی نیشتمانیی کوردستان جەختیکردەوە، کە وەک یەکێتی بەلایانەوە گرنگە لە زوترین کاتدا کابینەی دەیەمی حکومەتی هەرێم پێکبهێندرێت.
شایەنی باسە، هەردوولا لە ماوەی رابردوودا، چەندین کۆبوونەوەیان ئەنجامداوە و چاوەڕوان دەکرێت، پاش تەواوبوونی پشوەکانی جەژن دانوستانەکان بۆ پێکهێنانی حکومەتی نوێی هەرێم خێراتر بکرێت.