بەڕێوەبەرایەتی میدیا و زانیاری دەزگای ئاسایشی هەرێمی کوردستان، رایگەیاند لە دوو ئۆپراسیۆنی جیادا، هێزەکانیان دەستیان بەسەر بڕی 20 کیلۆگرام مادەی هۆشبەردا گرت.

بەپێی راگەیاندنەکە، لە چالاکی یەکەمدا کە ڕۆژی 13ـی نیسانی 2025 ئەنجام دراوە، بەڕێوەبەرایەتی گشتی نەهێشتنی مادە هۆشبەرەکان بە هەماهەنگی لەگەڵ بەڕێوەبەرایەتی گشتی ئۆپراسیۆنەکانی ئاسایش، توانیویانە لە ناوچەیەکی سنوری هەورامان، دەست بگرن بەسەر 10 کیلۆگرام مادەی هۆشبەری جۆری کریستاڵ.

هەروەها لە چالاکی دووەمدا کە ڕۆژی 14ـی نیسانی 2025 ئەنجام دراوە، بەڕێوەبەرایەتی گشتی نەهێشتنی مادە هۆشبەرەکان لە روبەروبوونەوەیەکدا لە شەقامی بازنەی مەلیک محمود، توانیویانە دوو بازرگانی مادەی هۆشبەر دەستگیر بکەن و دەستبگرن بەسەر 10 کیلۆگرام مادەی هۆشبەری جۆری حەشیشدا.

سەرچاوەکە ئاماژەی بەوەشداوە، بەپێی بڕیاری دادوەر، تۆمەتباران بە ماددەی 25ـی یاسای بەرەنگاربوونەوەی ماددە هۆشبەرەکان و کارتێکارە ئەقڵییەکان راگیراون و لێکۆڵینەوە لە دۆسیەکانیان بەردەوامە.

وەزارەتی بەرگری ئەمریکا (پێنتاگۆن) ئەو هەواڵانەی رەتکردەوە کە باس لەوە دەکەن هێزەکانی ئەمریکا لە بنکەیەکی سەربازی لە پارێزگای دێرەزۆری رۆژاوای کوردستان بەرەو عیراق دەکشێنەوە.

سەرچاوەیەکی فەرمی لە پێنتاگۆن رایگەیاند: "ئەمریکا بەردەوام هێزەکانی خۆی بەپێی پێویست لە ناوچەکە بڵاودەکاتەوە".

پێشتر میدیاکان لە زمانی سەرچاوەیەک لە هێزەکانی سوریای دیموکرات (هەسەدە)ەوە بڵاویانکردبووەوە کە ئەمریکا دەستیکردووە بە کشانەوەی هێزەکانی لە بنکەیەکی سەربازی لە نزیک کێڵگەی غازی کۆنیکۆ لە دێرەزۆر.

بەپێی ئەو سەرچاوانە، یەکەم کاروانی 70 ئۆتۆمبێل نزیکەی 10 ڕۆژ لەمەوبەر بنکەکەیان بەجێهێشتووە، کە لەنێویاندا ئامێری قورس هەبوون. هەروەها دوێنێ کاروانی دووەمی 200 ئۆتۆمبێلی لە کۆنیکۆوە بەرەو هەرێمی کوردستان بەڕێکەوتوون.

وتەبێژی وەزارەتی بەرگری ئەمریکا لە لێدوانێکدا بۆ ئاژانسی "ئاڕ ئای نۆڤۆستی" رونیکردەوە: "پێنتاگۆن لەسەر بنەمای پێداویستییەکانی ئۆپەراسیۆن و بارودۆخی نائاسایی بە بەردەوامی هێزەکانی لە ناوچەکان جێگیر دەکاتەوە ".

وتیشی: "ئەم گۆڕانکاریانە رەنگدانەوەی بەرنامەکەیانە و لەچوارچێوەی سیاسەتی بەرگری ئەمریکایە بۆ وەڵامدانەوەی خێرای هەر گۆڕان و هەڕەشەیەک".

کەناڵی "سی بی ئێس نیوز" ڕۆژی سێشەممە لە راپۆرتێکدا رایگەیاند کە ئەمریکا بەنیازە ئامادەیی سەربازی خۆی لە سوریا کەم بکاتەوە بە کشانەوەی بەشێک لە دوو هەزار سەربازەکەی، لە هەمانکاتدا ئەو هێزانەی کە ماونەتەوە لە ژمارەیەکی کەمتر لە بنکە و بارەگاکانی ئەو وڵاتە چڕ بکاتەوە.

دکتۆر لەتیف رەشید سەرۆک کۆماری عیراق، پێشوازیکرد لە دکتۆر مەحمود مەشهەدانی سەرۆکی پەرلەمان و لە میانی دیدارەکەدا کە لە بەغداد بەڕێوەچوو ، بارودۆخی سیاسی و ئەمنی لەسەر هەردوو ئاستی ناوخۆ و نێودەوڵەتی تاوتوێ کرا، هەروەها باس لە هەڵبژاردنی داهاتووی پەرلەمان کرا. 

لە دیدارەکەدا سەرۆک کۆمار جەختیکردەوە لە گرنگی تەواوکردنی ئامادەکاری و رێکارە پێویستەکان بۆ زامنکردنی سەرکەوتنی هەڵبژاردنەکان و هێنانەدی ویستی گەلی عیراق بۆ سەقامگیری و گەشەسەندن.

سەرۆک کۆمار جەختیکردەوە لە بەهێزکردنی هاریکاری نێوان سەرۆکایەتی کۆمار و ئەنجومەنی نوێنەران و بەدواداچوون بۆ رەشنووسی ئەو یاسایانەی کە لە لایەن سەرۆکایەتی کۆمارەوە پێشکەشکراوە بۆ وتووێژ و پەسەندکردن بەشێوەیەک کە مافی هەموو هاووڵاتییان بپارێزێت.

سەرۆک کۆمار ستایشی پەسەندکردنی یاسای بە پارێزگابونی هەڵەبجەی کرد لەلایەن پەرلەمانەوە و بە هەنگاوێکی مێژوویی وەسفکرد  بۆ چەسپاندنی دادپەروەری و رێزلێنان لە خوێنی ئەو شەهیدانەی کە لە قێزەونترین تاوانی مێژووی هاوچەرخ رژاوە .

لای خۆیەوە سەرۆکی پەرلەمانی عیراق سوپاس و پێزانینی خۆی بۆ سەرۆک کۆمار دەربڕی بۆ هەوڵەکانی لەپای چەسپاندنی سەقامگیری سیاسی لە وڵات و پابەندبوونی بە پاراستنی مافەکانی گەلی عیراق. هاوکات پابەندبوونی سەرۆکی ئەنجوومەنی نوێنەرانی دووپاتکردەوە بۆ بەردەوامبوون لە جێبەجێکردنی ئەرکەکانی بەشێوەیەک کە خزمەت بە بەرژەوەندییە باڵاکانی عیراق و گەلەکەی بکات.