نەبەز عەبدولحەمید، قائیمقامی قەزای ناوەندیی ھەولێر، بە کوردسات نیوزی رایگەیاند، رووداوەکە سێ رۆژ پێش ئێستا روویداوە و ئەو مۆڵە سزای خۆی وەرگرتووە و داخراوە، چونکە گۆرانییەکی تایبەت بە سەرۆکی رژێمی بەعسی لەناوچوو لێداوە و لێکۆڵینەوەش لەگەڵ خاوەنی مۆڵەکە کراوە.

راشیگەیاند، خاوەنی مۆڵەکە عەرەب نییە، بەڵکو خەڵکی باکووری کوردستانە و دوای لێکۆڵینەوەش دەرکەوتووە، کە گۆرانیەکە لە یوتیوب لێدراوە و نەخوازراوانە چووەتە سەر ئەو گۆرانیە، کە پیاھەڵدانە بە سەدام حسێن.

ئەوە جاری یەکەم نییە، لە شاری ھەولێر گۆرانی تایبەت بە سەرۆکی رژێمی بەعسی لەناوچوو لێبدرێت، پێشتر و لە مانگی تەمووزی ساڵی ڕابردوو ھۆتێلێک بەھۆی لێدانی گۆرانیەکی تایبەت بە سەدام حسێن داخرا.