دوێنێ پێنجشممە بەھۆی خۆڵبارینەوە گەشتە ئاسمانییەکان لە  فڕۆکەخانەکانی ھەولێر و سلێمانی راگیران. شەوی رابردووش تاھیر عەبدوڵا، بەڕێوەبەری فڕۆکەخانەی سلێمانی بە کوردسات نیوزی راگەیاند، دوای کەمبوونەوەی کاریگەری خۆڵبارینەکە گەشتەکانی فرۆکەخانەی سلێمانی دەستیان پێکردووەتەوە.

بەپێی نوێترین زانیاری گەشتەکانی فڕۆکەخانەی هەولێریش دەستیانپێکردووەتەوە .

ئاسۆ کەمال بەڕێوەبەری کەشناسی سلێمانیش رایگەیاند، کاریگەری ئەو شەپۆلە خۆڵبارینەی رووی لە ناوچەکانی ھەرێمی کوردستان و عێراق کردووە، زیاتر دەبێت و شەپۆلەکە تا ئێوارەی ھەینی بەردەوام دەبێت، وتیشی ئەگەری دووبارەبوونەوی خۆڵبارین لە چەند رۆژی داھاتوودا لەئارادایە. ئاماژەی بەوەشکرد، کاریگەری ئەو شەپۆلە خۆڵبارینە زیاتر لەسەر ناوچەکانی ئیدارەی گەرمیان، کەلار و کفری دەبێت.

بەڕێوەبەری کەشناسیی سلێمانی راشیگەیاند، پێدەچێت شەپۆلێکی بارانبارین ناوچە شاخاوییەکان بگرێتەوە و ئەگەری تاوە باران و ھەورەبروسکەش لەئارادایە.