بەپێی ئاژانسی هەواڵی بلومبرغ، ئەمریکا بە وڵاتانی ئەندام لە ئاژانسی نێودەوڵەتیی وزەی راگەیاندووە، کە پلانە ئێستاکان بۆ کێشانەوە لە کۆگا نەوتییەکان لە حاڵەتە لەناکاوەکاندا، بەس نییە بۆ کۆنتڕۆڵکردن و رێگریکردن لە بەرزبوونەوەی نرخەکانی سووتەمەنی.

ئاژانسەکە ئاماژەی بەوە کردووە کە بەرپرسە ئەمریکییەکان، لە کاتی بەشداریکردنیان لە کۆبوونەوەی ئاژانسی نێودەوڵەتیی وزە لە پاریس، تا ئێستا پێشنیارێکی رەسمیان سەبارەت بەو روشوێنانەی پێویستە بگیرێنەبەر پێشکەش نەکردووە، بەڵام بە شێوازێکی رەسمی کار دەکەن بۆ پاڵنەرێک بەرەو پابەندبوونێکی زیاتر کە کەمتر نەبێت لە 100 ملیۆن بەرمیل نەوت.

سوتەمەنییە شلەکە، کە سەرچاوەی یەکەمی وزەیە لە جیهاندا نرخەکەی بەردەوام لە گۆڕاندایە و بەراورد بە دوێنێش هەریەکە لە نەوتی خاوى برێنت و تەکساسی ئەمەریکیش بەرزبونەوەیان تۆمار کرد، نەوتی برێنت  لە  سەرو 110 دۆلارەوە مامەڵەی پێوەدەکرێت.

ئەمڕۆ چوارشەممە، بەهۆی گرژییەکانەوە نرخی نەوت بە ناجێگیری ماوەتەوە و بەراورد بە دوێنی بەرزبوەتەوە؛ لە ئێستادا بەرمیلێک نەوتی خاوی برێنت لە بازاڕەكانی جیهان بە 110 دۆلار و 50 سەنت مامەڵەی پێوەدەکرێت.

هاوكات جیا لە نەوتی برێنت، نرخی بەرمیلێک نەوتی رۆژئاوای تێكساسیش  بە  99 دۆلار و 24 سەنت لە بازاڕەکاندا مامەڵەی پێوەدەکرێت.