لیژنەی دارایی ئەنجومەنی نوێنەرانی عیراق ئامادەكارییەكانی بۆ بودجەی ساڵی داهاتوو كردووە و پرسی كورتهێنانی بودجە گەورەترین ئاڵەنگاریی بەردەمیانە.

ئیخڵاس دلێمی ئەندامی لیژنەی دارایی ئەنجومەنی نوێنەرانی عیراق رایگەیاند، ئامادەكارییان بۆ پرۆژەیاسای بودجەی ساڵی 2027 كردووە و پێشبینی دەكەن كورتهێنان لە بودجەدا بگاتە 65 ترلیۆن دینار، بۆ روبەڕوبوونەوەی ئەم كورتهێنانەش، لیژنەكە گۆڕانكاری لە نرخی دراو و ئەو چارەسەرانە تاوتوێ دەكات كە لەلایەن وەزارەتی داراییەوە پێشكەش دەكرێن.

ئیخڵاس دلێمی راشیگەیاندووە، لە بودجەی ساڵی داهاتوودا موچەی موچەخۆران بە تەواوی مسۆگەر كراوە، بەتایبەت ئێستا كە قەبارەی هەناردەكردنی نەوت بەرزبووەتەوە و یەدەگی دراوی باش لە بانكی ناوەندیدا هەیە.

ئەو ئەندامەی لیژنەی دارایی ئاماژەی بەوەشكردووە، لە 15ی مانگی داهاتوودا پرۆژەیاساكە دەگاتە ئەنجومەنی نوێنەران.

سوتەمەنییە شلەکە، کە سەرچاوەی یەکەمی وزەیە لە جیهاندا نرخەکەی بەردەوام لە گۆڕاندایە و بەراورد بە دوێنێش هەریەکە لە نەوتی خاوى برێنت و تەکساسی ئەمەریکیش نزمبونەوەیان تۆمار کرد، نەوتی برێنت  لە  خوار 100 دۆلارەوە مامەڵەی پێوەدەکرێت.

ئەمڕۆ چوارشەممە،، بەهۆی گرژییەکانەوە نرخی نەوت بە ناجێگیری ماوەتەوە و بەراورد بە دوێنی نزمبوەتەوە؛  لە ئێستادا بەرمیلێک نەوتی خاوی برێنت لە بازاڕەكانی جیهان بە 98 دۆلار و 14 سەنت مامەڵەی پێوە دەکرێت.

هاوكات جیا لە نەوتی برێنت، نرخی بەرمیلێک نەوتی رۆژئاوای تێكساسیش  بە  88 دۆلار و 81 سەنت لە بازاڕەکاندا مامەڵەی پێوەدەکرێت.