وەزارەتی دارایی عیراق وردبینی لیستی موچەی مانگی تەمموزی تەواوكرد و چاوەڕوان دەكرێت لە چەند رۆژی داهاتوودا پارەی موچە رەوانە بكرێت.

بەپێی زانیارییەكانی لێپرسراوێکی وەزارەتی دارایی و ئابوریی هەرێمی كوردستان، لیستی موچەی مانگی حەوت لە وەزارەتی دارایی فیدراڵ وردبینی كراوە و پەسەندكراوە، تیمی تەكنیكیی وەزارەتەكە كە رۆژی چوارشەممە 22-07 لیستەكان و راپۆرتی تەرازوی پێداچوونەوەیان رادەستی بەغداد كردبوو، رۆژی پێنجشەممەی هەفتەی رابردوو گەڕاونەتەوە بۆ هەولێر.

حكومەتی فیدراڵ لە 20-07ـەوە دەستی بە دابەشكردنی موچەی فەرمانبەرانی خۆی كردووە، بەڵام هێشتا نیوەی وەزارەت و فەرمانگەكانی عیراق موچەیان وەرنەگرتووە، پێشبینی دەكرێت تا كۆتایی ئەم مانگە دابەشكردنی موچە لە عیراق كۆتایی بێت و پاشان بەغداد تەمویلی موچەی هەرێمی كوردستان رەوانە بكات.

چاوەڕوان دەكرێت هاوشێوەی مانگەكانی رابردوو، بەغداد بڕی 120 ملیار دینار پشکی موچەی هەرێم ببڕێت و بڕی 841 دیناری وەك تەمویلی موچەی مانگی تەمموز رەوانە بكات.

ئەندامێکی فراکسیۆنی یەکێتی لە ئەنجومەنی نوێنەرانی عیراق، ئیمزای 109 پەرلەمانتاری کۆکردووەتەوە بۆئەوەی موچەی 86 هەزار فەرمانبەری گرێبەستی هەرێم بخرێتە ناو بودجەی ساڵی 2027ـی عیراق.

پۆڵا شەهید سیروان، ئەندامی ئەنجومەنی نوێنەرانی عیراق لە فراکسیۆنی یەکێتیی نیشتمانیی کوردستان رایگەیاند، لە هەوڵی بەردەوامدان بۆ چارەسەرکردنی بنەڕەتیی کێشەی زیاتر لە 86 هەزار فەرمانبەری گرێبەست لە هەرێمی کوردستان.

پۆڵا شەهید سیروان ئاماژەی بەوەدا، بۆ ئەم مەبەستە ئیمزای 109 پەرلەمانتاریان کۆکردووەتەوە، تا موچەی ئەو فەرمانبەرانەی کە کۆی گشتییەکەی نزیکەی 43 ملیار دینارە بخڕێتە ناو بودجەی گشتیی ساڵی2027ـی عیراقەوە.

جەختیشی کردەوە کە ئەم هەنگاوە دەبێتە چارەسەرێکی ریشەیی و بنەڕەتی بۆ کۆتاییهێنان بە کێشەی چەندین ساڵەی فەرمانبەرانی گرێبەست لە هەرێمی کوردستان.