ئەمڕۆ شەممە، دووەمین کۆڕبەندی ئابوریى نێودەوڵەتیی دێڵفی لە سلێمانی دەسیپێدەکات و سبەینێش بەردەوام دەبێت، کەسایەتییە باڵاکانی سەر ئاستی کوردستان و عیراق و جیهان بەشداری کۆڕبەندەکە دەبن.

 

بۆ جاری دووەم و بەچاودێریی قوباد تاڵەبانی، جێگرى سەرۆک وەزیرانی هەرێمی کوردستان، کۆڕبەندی ئابورى دێڵفی ئەمڕۆ و سبەینێ، لە هۆڵى فاوندەیشن لەکارگەى کلتورى لە سلێمانی دەبەسترێت.

 

کۆڕبەندەکەی ئەمساڵ کەسایەتییە باڵاکانی سەر ئاستی کوردستان و عیراق و جیهان کۆدەکاتەوە و لەگەڵ لێپرسراوانی وڵاتانی خاوەن ئابورى بەهێزی جیهان بۆ دیالۆگ کردن لەسەر گرنگترین ئاڵنگارییە سیاسی و ئەمنی و ئابورییەکانی ناوچەکە، بەتایبەت کە رۆژهەڵاتی ناوەڕاست بەقۆناغێکی پڕ گۆڕانکارى جیۆپۆلیتیکیدا تێپەڕدەبێت، تێیدا بەشداردەبن.

 

لە میانەی کارەکانی کۆڕبەندی ئابورى دێڵفى دا، داڕێژەرانی سیاسەت و بڕیاربەدەستان و گەورە بازرگانانی وڵاتانی (یۆنان، تورکیا، بولگاریا، رۆمانیا، جۆرجیا، پۆڵەندا، ئیتاڵیا و فەرەنسا) گفتوگۆى چڕ دەکەن لەسەر ئاسایشی هەرێمی و وزە، گواستنەوەى سەوز، گەشەپێدانی ئابورى و دەرفەتە نوێیەکانی وەبەرهێنان لەلایەک و پرسەکانی حکومڕانی و هەوڵەکانی چاکسازی لەلایەکی ترەوە.

 

لەکاتێکدا جیهان لە سەروبەندی دووبارە بوژاندنەوەدایە بەتایبەت لەدواى کێشمەکێشەکانی جیهان، کۆڕبەندی ئابورى دێڵفى، پەرۆشیی هەرێمی کوردستان دەسەلمێنێت لە پشتیوانیی ئەنجامدانی گفتوگۆى بنیاتنەرانە و توندکردنەوەى پەیوەندییە ستراتیژیەکانی نێوان خۆرهەڵاتی ناوەڕاست و ئەوروپا و ئەمریکا و داڕشتنەوەى سیاسەتە ئابورییەکان.

 

لە ئامێزگرتنی کۆڕبەندی ئابورى دێڵفی بۆ ساڵى دووەم، پێگەى سلێمانی لەسەر نەخشەى وزەى جیهان جێگیر دەکات و هانی دیالۆگی ئەرێنی دەدات بۆ پشتیوانی رێوشوێنەکانی بەهێزکردنی سیاسەتی ئابورى و گەشەپێدانی لە رەوشی دژوار و ناسەقامگیرەکانیشدا.

نرخی گازی سروشتی لە ئەورووپا بەرزبووەوە و بەرەو تۆمارکردنی دەستکەوتی هەفتانە دەڕوات، ئەمەش لە ژێر تیشکی بەردەوامیی بنبەست و رێکنەکەوتنی نێوان ویلایەتە یەکگرتووەکانی ئەمریکا و ئێراندا.

ئەمڕۆ هەینی، ئاژانسی "بلۆمبێرگ" بڵاویکردەوە، گازی سروشتی ئەوروپا لە هەینی رابردووەوە بە رێژەی نزیکەی 7٪ بەرزبوونەتەوە، لە کاتێکدا نرخەکان رۆژی پێنجشەممەی رابردوو بەرزترین ئاستی خۆیان لە ماوەی چوار مانگی رابردوودا تۆمارکرد.

ئەم بەرزبوونەوەیە دوای بڵاوبوونەوەی داتایەک دێت کە دەریخستووە کۆگاکانی گازی ئەورووپا لەوەی چاوەڕوان دەکرا زیاتر کەمیان کردووە، لە کاتێکدا رێژەی پڕبوونی دامەزراوەکانی کۆگاکردن لە کیشوەرەکەدا لە 41٪ تێپەڕ ناکات، ئەمەش مەترسییەکان لەسەر توانای ئەورووپا بۆ دابینکردنی پێداویستییەکانی لە مانگەکانی داهاتوودا زیاتر دەکات.

ئاژانسەکە ئاماژەی بەوەش کردووە، بەردەوامیی داخرانی گەروی هورمز یان رووبەڕووبوونەوەی جووڵەی دەریاوانی تێیدا بۆ هەر پشێوییەک، رەنگە ببێتە هۆی توندبوونی ململانێی نێوان ئەورووپا و ئاسیا لەسەر بارە گواستراوەکانی گازی سروشتی شل (LNG) لە رێگەی دەریاوە لە وەرزی هاویندا، ئەمەش وا دەکات نرخەکان بەرەو بەرزبوونەوەی زیاتر پاڵ پێوە بنێت.

بازاڕەکان لە نزیکەوە چاودێری پێشهاتەکانی مەلەفی ئێران و دانوستانەکانی لەگەڵ ویلایەتە یەکگرتووەکانی ئەمریکا دەکەن، بەهۆی ئەو کاریگەرییە راستەوخۆیەی کە لەسەر رەوتی وزەی جیهانی و سەقامگیری بازاڕەکانی گاز هەیەتی.