وەزارەتی دارایی هەرێم ئامادەکارییەکانی بۆ دابەشکردنی موچەی مانگی 10 تەواوکردووە، هاوکات سیستمی پەیرۆڵ بۆ لیستی موچەی مانگی 11 کارا کراوە.

بڕیار محەمەد، پەیامنێری کوردسات نیوز، رایگەیاند، سەرجەم ئامادەکارییەکان لەلایەن وەزارەتی دارایی و ئابوریی هەرێمی کوردستانەوە بۆ دابەشکردنی موچە تەواو کراون و کورتهێنانی مانگانەی 120 ملیار دیناریش پڕ کراوەتەوە.

ئاماژەی بەوەشکرد، لیستی موچە و سەرجەم نووسراوە رەسمییەکان بۆ بانکی ناوەندی 'لقی هەولێر' ئامادەن و لەلایەن وەزیری داراییەوە ئمزایان لەسەر کراوە، ئەگەر ئەمڕۆ تا سەعات 12ی نیوەڕۆ پارەکە بگاتە سەر هەژماری وەزارەتی دارایی، راستەوخۆ دەست بە وەرگرتن و دابەشکردنی موچە دەکرێت و پرۆسەکە لە ماوەی چەند رۆژێکی کەمدا تەواو دەبێت.

هەروەها بەپێی دواین زانیاریی سەرچاوە ئاگادارەکان، رێکارەکان لە بەغدادەوە تەواوبوون و لە ماوەکانی داهاتوودا دەست بە تەمویلکردن و ناردنی پارەی موچەی فەرمانبەرانی هەرێمی کوردستان دەکرێت بۆ ئەوەی بخرێتە سەر هەژماری وەزارەتی دارایی.

لەلایەکی تریشەوە، سەرچاویەک لە گەنجینەی هەرێم بە کوردسات نیوزی راگەیاند، سیستمی پەیرۆل بۆ داخڵکردنی لیستی موچەی مانگی 11ـی  فەرمانبەرانی هەرێم کاراکرا.

سەرۆکی پەرلەمانی ئێران هەڕەشەی وەڵامێکی چاوەڕواننەکراو و بێسنوری جوگرافی لە ئەمریکا دەکات و رایدەگەیەنێت، تۆپەکە ئێستا لە یاریگەی واشنتنۆدایە بۆ رێگریکردن لە جەنگ.

محەمەد باقر قاليباف، سەرۆکی پەرلەمانی ئێران رایگەیاند، وڵاتەکەی لە بەرزترین ئاستی ئامادەباشیی بەرگریی و سەربازیدایە، و هۆشداریشی دا کە هەر هێرشێک یان هەڵەسەنگاندنێکی هەڵە لەلایەن ئەمریکاوە، رووبەڕووی وەڵامێکی چاوەڕواننەکراو و بێ سنورداریی جوگرافی دەبێتەوە.

قاليباف ئاماژەی بەوەکرد، جەنگەکانی رابردوو بۆ ئەمریکا و هاوپەیمانەکانی لە ناوچەکەدا سەلماندیان کە سەردەمی دەستدرێژی کۆتایی پێهاتووە، جەختیشیکردەوە، کە رابەری باڵای ئێران ستراتیژی سەربازیی وڵاتەکەی بۆ بەرپەرچدانەوەی هەر هێرشێک دیاریکردووە.

سەرۆکی پەرلەمانی ئێران راشیگەیاند، وەڵامی ئێران بۆ هەر هەڵەیەکی دوژمن وەڵامێکی چاوەڕواننەکراو دەبێت و هەموو هاوکێشە و دامەزراوەکانی تێکدەشکێنێت، جەختیشی کردەوە کە تاران وەڵامێکی بەهێز و عاقڵانەی داوەتەوە ئەمریکا و ئێستا تۆپەکە لە یاریگای واشنتنۆدایە بۆ رێگریکردن لە هەڵگیرسانی جەنگ.

لە کۆتاییدا ئەوەشی خستەڕوو، هەر هەڵەیەکی ستراتیژیی نوێی ئەمریکا دەبێتە هۆی ئاوەڵاکردنی دەرگای جەنگێکی نوێ، بە شێوازێک کە واشنتۆن بە قورسی دەرچە و رێگەی دەربازبوونی دەستدەکەوێت.

کەشناسیی هەرێم پێشبینییەکانی کەشوهەوای 48 سەعاتی داهاتووی بڵاوکردەوە و ئاشکرایکرد، نزمە پاڵەپەستۆیەک روو لەناوچەکە دەکات و  نمەباران و بارانبارانی مامناوەند چەندین ناوچەی جیاوازی هەرێمی کوردستان دەگرێتەوە.

بەڕێوەبەرایەتی گشتی کەشناسی و بومەلەرزەزانیی هەرێم رایگەیاند، ئەمڕۆ ئاسمانی ناوچە جیاجیاکان نیمچە هەور دەبێت هەندێ کات بۆ ساماڵ و پەلە هەور دەگۆڕێت، هاوکات ئەگەری نمە باران لەسەر ناوچە شاخاوییە بەرزەکان هەیە لە هەندێک کاتدا.

ئاماژەی بەوەشکرد، سبەینێ ناوچەکە دەکەوێتە ژێر کاریگەری نزمە پاڵەپەستۆیەکی لاواز، لە دوای نیوەڕۆوە پێشبینی نمەباران هەیە لەسەر ناوچە جیاجیاکانی ئیدارەی گەرمیان و بەشێک لە سلێمانی و باشوری پارێزگای هەولێر و پارێزگای دهۆک و ناوچە شاخاوییەکان بە گشتی.

کەشناسیی هەرێم راشیگەیاند، ئەگەری زیادبوونی کاریگەری ئەو نزمە پاڵە پەستۆیە هەیە و لە دوای نیوەڕۆوە لە کاتی زیادبوونی شێوازی بارانبارین دەگۆڕێت بۆ بارانی مامناوەند و هەورەبروسکە.

بەرزترین پلەکانی گەرمای پێشبینیکراو بە پلەی سیلیزی:

هەولێر: 24 پلەی سیلیزی

پیرمام: 22 پلەی سیلیزی

سلێمانی: 23 پلەی سیلیزی

هەڵەبجە:24 پلەی سیلیزی

چەمچەماڵ: 27 پلەی سیلیزی

دهۆک: 23 پلەی سیلیزی

زاخۆ: 24 پلەی سیلیزی

ئاکرێ:25 پلەی سیلیزی

گەرمیان:28 پلەی سیلیزی

حاجی ئۆمەران:14 پلەی سیلیزی