کەشناسیی هەرێم پێشبینییەکانی کەشوهەوای 48 سەعاتی داهاتووی بڵاوکردەوە و ئاشکرایکرد، نزمە پاڵەپەستۆیەک روو لەناوچەکە دەکات و  نمەباران و بارانبارانی مامناوەند چەندین ناوچەی جیاوازی هەرێمی کوردستان دەگرێتەوە.

بەڕێوەبەرایەتی گشتی کەشناسی و بومەلەرزەزانیی هەرێم رایگەیاند، ئەمڕۆ ئاسمانی ئەمڕۆی ناوچە جیاجیاکان نیمچە هەور دەبێت هەندێ کات بۆ ساماڵ و پەلە هەور دەگۆڕێت، هاوکات ئەگەری نمە اران لەسەر ناوچە شاخاوییە بەرزەکان هەیە لە هەندێک کاتدا.

ئاماژەی بەوەشکرد، سبەینێ ناوچەکە دەکەوێتە ژێر کاریگەری نزمە پاڵەپەستۆیەکی لاواز، لە دوای نیوەڕۆی سبەینێوە پێشبینی نمەباران هەیە لەسەر ناوچە جیاجیاکانی ئیدارەی گەرمیان و بەشێک لە سلێمانی و باشوری پارێزگای هەولێر و پارێزگای دهۆک و ناوچە شاخاوییەکان بە گشتی.

کەشناسیی هەرێم راشیگەیاند، ئەگەری زیادبوونی کاریگەری ئەو نزمە پاڵە پەستۆیە هەیە و لە دوای نیوەڕۆوە لە کاتی زیادبوونی شێوازی بارانبارین دەگۆڕێت بۆ بارانی مامناوەند و هەورەبروسکە.

بەرزترین پلەکانی گەرمای پێشبینیکراو بە پلەی سیلیزی:

هەولێر: 24 پلەی سیلیزی

پیرمام: 22 پلەی سیلیزی

سلێمانی: 23 پلەی سیلیزی

هەڵەبجە:24 پلەی سیلیزی

چەمچەماڵ: 27 پلەی سیلیزی

دهۆک: 23 پلەی سیلیزی

زاخۆ: 24 پلەی سیلیزی

ئاکرێ:25 پلەی سیلیزی

گەرمیان:28 پلەی سیلیزی

حاجی ئۆمەران:14 پلەی سیلیزی

لێپرسراوێکی باڵای ئێران بۆ رۆیتەرز ئاشکرایکردووە، تاران و واشنتۆن دوورن لە گەیشتن بە رێککەوتنی کۆتایی جەختیشی کردەوە وڵاتەکەی چۆک بۆ داواکارییە زیادەڕۆییەکانی ئەمریکا دانادات.

لێپرسراوێکی باڵای ئێران بە ئاژانسی هەواڵی رۆیتەرزی راگەیاندووە، تاران و واشنتۆن هێشتا بەردەوامن لە هەوڵەکانیان، بەڵام لە تێگەیشتن و گەیشتن بە رێککەوتنی کۆتایی بۆ کۆتاییهێنان بە جەنگ بە دوور دەبینرێن.

ئەو لێپرسراوە جەختی لەوەکردەوە، وڵاتەکەی بە هیچ جۆرێک بۆ داواکارییە زیادەڕۆییەکانی ئەمریکا چۆک دانادات، لە هەمان کاتدا نێوەندگیرەکان بە چڕی کار دەکەن بۆ نزیککردنەوەی دیدگاکان و کەمکردنەوەی جیاوازییەکانی نێوان تاران و واشنتۆن.

لە بەشێکی تری لێدوانەکەیدا بۆ رۆیتەرز، ئەو بەرپرسە هەڕەشەی راستەوخۆی ئاڕاستەی ئەمریکا کرد و رایگەیاند، ئێران لە ئامادەباشی تەواودایە بۆ وەڵامدانەوەیەکی زۆر توند و بێبەزەییانە بەرانبەر هەر هێرشێک یان لێدانێکی سەربازیی ئەمریکا، چ لە ناوچەکەدا بێت یان لە دەرەوەی سنورەکانی ناوچەکە.

سەرۆکی ئەمریکا دەڵێت، ئێران تا ئێستاش خاوەنی هەندێک موشەک و فڕۆکەی بێفڕۆکەوانە، بەڵام توانای بەرهەمهێنانی زیاتر لەلایەن تارانەوە بە شێوەیەکی زۆر بەرفراوان سنوردار بووە.

دۆناڵد ترەمپ، سەرۆکی ئەمریکا لە چاوپێکەوتنێکدا لەگەڵ کەنالی فۆکس نیوز رایگەیاند، وڵاتەکەی توانا و دەسەڵاتی ئەوەی هەیە لە هەر کاتێکدا بیەوێت هێرشبکاتەسەر بنکەی ئەتۆمی کێوی کوڵنگ لە ئێران.

جەختیشیکردەوە، رەنگە واشنتۆن ناچار بێت ئەو شوێنە ئامانج بگرێت، و ئەنجامدانی ئۆپراسیۆنەکەش دەکرێت نزیکەی یەک سەعات بخایەنێت.

سەرۆکی ئەمریکا ئەوەشی خستەڕوو، ئێران لە پێگەیەکی باشی گفتوگۆکردندا نییە و ئابورییەکەی رووبەڕووی داڕمانی گەورە بووەتەوە، بەپێویستیشی زانی تاران بەپەرۆشەوە هەوڵی بەدەستهێنانی رێککەوتن لەگەڵ ئەمریکا بدات.

ترەمپ ئاماژەی بەوەشکرد، ئەو لەپێناو رێگریکردن لە کەوتنی قوربانیی زیاتر و رزگارکردنی گیانی زۆرێک لە مرۆڤەکان، رێککەوتن لەگەڵ ئێران بە باشتر دەزانێت، ئەگەر دەرفەتی بەدیهێنانی هەبێت.

لە کۆتاییدا ئاشکراشیکرد، وڵاتەکەی لە پێگەی هێزی رەهاوە دانوستان لەگەڵ ئێران دەکات، و ئەمریکا توانای ئەوەی هەیە لە هەر کاتێکدا بە گونجاوی بزانێت کۆتایی بەم رووبەڕووبوونەوەیە بهێنێت.