وەزیری دەرەوەی ئەڵمانیا رایگەیاندووە، بەردەوامی هێرشەکانی روسیا بۆسەر ئۆکراین وەک بێڕێزیکردنە بە دۆناڵد ترەمپ، دەشڵێت، یەکێتی ئەوروپا و ئەمریکا سزای تۆقێنەر بەسەر ئابوری روسیادا دەسەپێنن.

یۆهان فادیفۆل وەزیری دەرەوەی ئەڵمانیا، ڤلادیمێر پوتنی سەرۆکی روسیا بە فریودانی هاوپەیمانەکانی ئۆکراین ناودەبات بۆ گەیشتن بە ئاگر بەست، دەشڵێت: پوتن بێڕێزی بە مافی مرۆڤ دەکات، کە ئەوەش وەک بێڕێزی بەرانبەر دۆناڵد ترەمپ وایە.

ئەو وەزیرە ئەڵمانییە ئاماژەی بەوەکردووە، دۆناڵد ترەمپ هەوڵی زۆری داوە بۆ ئەوەی پوتن بەرەو مێزی گفتوگۆ رابکێشێت، بۆیە ئەم هێرشانەی کۆتایی روسیا وەک وەڵامی پوتنە بۆ هەوڵەکانی ترەمپ.

ئەوەش لە کاتێکدایە، لە شەوی شەممەی رابردوودا، روسیا 300 هێرشی زەمینی و 70 هێرشی ئاسمانی بۆسەر ئۆکراین ئەنجام داوە، کە لە سەرەتای دەستپێکی جەنگی نێوان ئەو دوو وڵاتەوە، ئەوە زۆرترین ژمارەی هێرشەکانی روسیایە لەماوەی یەک شەودا.

لەو بارەیەشەوە ئۆکراین رایگەیاندووە، بەهۆی هێرشەکانی روسیاوە 12 کەس گیانیان لەدەستداوە و بە دەیان کەسی دیکەش بریندار بوون.

لەو بارەیەشەوە فادیفۆل ئەوەی خستووەتە روو، "ئەو کارانەی روسیا ئەوە دەسەلمێنێت کە پوتن ئاشتی ناوێت، دەیەوێت شەڕ بەردەوام بێت، بۆیە پێویستە رێگەی نەدەین".

باسی لەوەشکردووە، لە ئێستادا سزای زیاتر لە یەکێتی ئەوروپا و ئەنجومەنی پیرانی ئەمریکاوە ئامادە دەکرێت بۆئەوەی بەسەر روسیادا بسەپێنرێت، کە ئەوەش وەڵامێکی روون دەبێت بۆ روسیا، کە ئەوانە "سزای تۆقێنەر دەبن بۆسەر ئابوری روسیا".