وەزیری دەرەوەی روسیا رایگەیاند، كۆبونەوەكەی لەگەڵ وەزیری دەرەوەی ئەمریكا لە سعودیە ئەرێنی بووە و زەمینەسازی بووە بۆ كۆبونەوەی ترەمپ و پوتن.

سێرگی لاڤرۆڤ، وەزیری دەرەوەی روسیا لە كۆنفڕانسێكی رۆژنامەوانیدا لە سعودیە رایگەیاند، لە كۆبوونەوەكەدا لەگەڵ وەفدی ئەمەریكی باسیان لە چالاككردنی نوێنەرایەتییە دیپلۆماسییەكانی نێوان مۆسكۆ و واشنتن كردووە، هاوكات باسیان لە پەرەپێدانی پەیوەندییە بازرگانییەكان لەگەڵ ئەمریكا و رێگەكانی گەیشتن بە چارەسەری كێشەی ئۆكراین كردوە،  هەروەها رێككەوتن بۆ زەمینەسازیی بۆ كۆبوونەوەی پوتن و ترەمپ.

وتیشی، كۆبوونەوەكە بەرهەمدار بووە و لایەنی ئەمریكا تێگەیشتنێكی باشتری بۆ هەڵوێستەكانی روسیا هەیە.

لە بەرانبەردا مارك رۆبیۆ، وەزیری دەرەوەی ئەمەریكاش رایگەیاند، هەردولا رێككەوتن بەرژەوەندی یەكتری لەبەر چاوبگرن و دووپاتیانكردەوە لەوەی پێویستە باڵیۆزخانەكانیان لە وڵاتی یەكدی بكەنەوە بۆ ئەوەی دیپلۆماسی سەربگرێت.